彭馬豪取「大四喜」屠愛華頓 單季20球暫列金靴榜首

曼城青訓高爾彭馬（Cole Palmer）今季為咗更多機會而轉投車路士，轉會時有邊個諗過，佢有同前隊友夏蘭特競爭英超金靴嘅能力？週一晚英超聯賽，車路士主場佈陣，6-0大炒來訪嘅愛華頓。當中彭馬個人貢獻4個入球，其中兩球技驚四座，個人入球數上升到20球之多，同夏蘭特同分金靴獎榜首。

因為安素費南迪斯要進行醫學評估，主帥普捷天奴（Mauricio Pochettino）常用三中場要暫時拆夥，今場改成4-4-1-1，將彭馬置入中路，同中鋒積遜（Nicolas Jackson）來回走位，偏偏係呢對中路鋒線組合，形成車路士咁強嘅聲勢。開賽13分鐘，彭馬同積遜平排之後再稍稍墮後接應，先突破中堅班夫韋治跨下，再同積遜一個簡單one-two後直接起腳，內彎遠柱收死賓褔特。5分鐘後積遜近射被擋，彭馬由禁區頂衝入小禁區，無人看管頭槌執雞2-0。兩個失球後，愛華頓醒醒定定，冷靜地由後場開始進攻。但一次碧褔特喺禁區頂控球時，被積遜施壓後草草傳比中場奧拿拿，後者身旁嘅彭馬即刻截波，直接右腳吊入空門，半小時內完成「完美帽子戲法」，左腳、右腳、頭槌齊哂。

前場雙子嘅組合，合力砲製彭馬嘅三球。中間仲有彭馬褪後造波拉邊，比積遜接應傳中射入一球。但下半場竟然出現互爭十二碼嘅戲碼，代隊長加拉加出手調停，最後由彭馬射入個人第四球。到最後十分鐘彭馬落場休息，後備小將基卓斯射成6-0，錦上添花。
經此一役，彭馬連續兩場喺車路士主場取得帽子戲法，英超入球數上升至20球，追平曼城神鋒夏蘭特嘅入球數之餘，兼有9次助攻，生涯首季做主力，就有機會達成「雙雙」數字。另外，據《SkySports》嘅紀錄，彭馬今日創下車路士隊史喺英超最快嘅帽子戲法，同時亦係史丹福橋球隊連續七場入球嘅第一人。

21歲嘅年紀就打破幾項紀錄，彭馬前途無可限量。而以今季車路士對佢嘅依賴，絕對有能力挑戰金靴獎。