【利華古遜】5-0大勝豪取隊史首冠！利華古遜完成歷史任務 精選 推薦

利華古遜今季成功奪冠嘅歷程，相信無論你係邊一隊嘅球迷，都會深深感到佩服。

週末德甲第29輪聯賽，喺聯賽榜首有16分優勢嘅利華古遜，只需要全取三分，就可以喺主場鎖定冠軍。呢場意義重大嘅比賽，利華古遜直頭對雲達不來梅連轟5球之多，以一場5-0嘅大勝，迎接隊史第一個德甲冠軍。未吹完場雞，球迷已經佔領草場，同球隊一齊慶祝呢個歷史時刻。
呢場波利華古遜冇因為對手狀態差劣而留力，用返今季一路以嚟嘅3-4-2-1勝利方程式，力求完成三分全取嘅歷史任務。鋒線主將邦尼菲斯因為內收肌受傷而一直休養，今場係2024年第一次正選，上半場十二碼為球隊先開記錄。

不來梅中場空虛，沙卡、獲斯各自喺離底線三十碼嘅位置轟出遠射，無人mark實嘅情況下，兩度收死不來梅開將薛迪拿。不來梅落後3球之下全軍壓上，反被利華古遜打反擊，比賽末段再由獲斯射入2球，個人大演帽子戲法，為呢場奠定聯賽冠軍嘅勝仗錦上添花。

大勝過後，利華古遜喺德甲已經累積79分，仲有5場聯賽未踢嘅情況之下，積分已經高過過去3季拜仁慕尼黑嘅冠軍積分。拜仁目前只得63分，同榜首利華古遜積分差16分之多，數字上唔可能後上奪冠，11連霸嘅稱霸走勢就此斷纜。已經喺歷史上留名，但2023/24球季仲未結束。喺聯賽雖然已經名成利就，但佢哋依然仲係五大聯賽之中，今季唯一嘅不敗之師。補充少少資料，目前利華古遜嘅不敗記錄嚟到43場，已經力壓幾年前拜仁慕尼黑所創下嘅33場不敗。如果嚟緊5場聯賽都保住金身，將令佢哋嘅歷史地位更加輝煌，成為德甲史上第一支不敗王者。
跟著落嚟，利華古遜仲有歐霸、德國盃兩條戰線。德國盃嘅對手會係德乙護級份子凱沙羅頓，而歐霸已經晉級到八強，首回合以2-0領先英超嘅韋斯咸，全場表現輾壓對手，晉級決賽呼聲高唱入雲。

作為呢個夢幻球季之中最重要嘅角色，主帥沙比阿朗素功不可沒，佢一年半前走馬上任，生涯第一次喺一隊執教，將利華古遜由一支護級份子，蛻變成而家呢支德國冠軍。亦因為今季喺利華嘅好表現，沙比得到拜仁慕尼黑、利物浦等等勁旅青睞，但佢喺奪冠前嘅個幾星期表示下季會留喺利華古遜，對穩定軍心非常重要。