【外借拜仁】臨完約被熱刺冷落 迪亞：完全理解 精選

十年過去，艾歷迪亞再唔係當初嗰個由葡萄牙回流嘅後防新星，30歲嘅年紀，球員生涯路向理應要定型。同熱刺完約前嘅最後一季，偏偏今季係迪亞喺熱刺最失落嘅一季。

「呢六個月係我職業生涯最具挑戰性嘅時期，真係過得唔好。我嘗試保持冷靜，實際分析發生咩事。」效力熱刺第10年嘅迪亞，目前被借到拜仁慕尼黑，佢近日接受專訪，回想起季初被冷落嘅感受。
熱刺今季有新帥普斯迪高古加盟，一洗頹風，重塑體系，好快就收到成效大，前十場聯賽仲打出不敗走勢。但呢個過程，迪亞完全冇參與，佢第一次上陣，係第11輪聯賽因為羅美路紅牌，先至臨危受命。
之後熱刺後防傷患連連，羅美路同雲迪芬同時受傷，普斯迪高古為咗保持體系嘅流暢，寧願用賓戴維斯、艾馬臣兩個閘位客串夾中堅，都唔比機會迪亞。再進一步講，達雲遜山齊士喺轉會離隊之前，出場順序都比迪亞高。

好明顯，迪亞今季喺熱刺完全失寵，連以往後防「通天佬倌」嘅屬性都冇得顯現。
面對艱難時期，但迪亞傾向接受現實，冇特別憤世嫉俗。 成個上半季，迪亞都冇向普斯迪高古公開埋怨。值得一提嘅，係一次係喺季中後防傷患潮之時，普斯迪高古被記者問到喺呢個情況下，係咪都會放迪亞離隊，佢答咗句：「yes」，呢個答案就令迪亞有啲失望。

「嚟咗個新教練想試新嘢，而我嘅合約只剩一年。球會想要有新開始，我完全理解。」迪亞對呢個情況冇任何怨恨，態度非常寬容，唔認為同普斯迪高古有個人問題，客觀地講述上半季嘅困難。
之後就係大家所知道嘅發展，同熱刺合約僅剩半年嘅迪亞，而家以借將身份效力拜仁慕尼黑。明顯熱刺冇意願同佢續約，迪亞就喺德甲保持狀態，以求有適合佢嘅下家。目前睇嚟，迪亞喺拜仁融入得唔錯，學緊德文之餘，喺拜仁下半季企穩主力，情況同上半季截然唔同。

「九年嘅時間裏面，一定會有起有落，有遺憾有失望都好正常，有時會過度陷於深思。我回望呢段日子，心中只有愛。」過去九年，迪亞用20歲至30歲之間嘅呢段光陰，陪伴住熱刺起起落落，爭逐英聯盃、英超乃至歐聯嘅冠軍寶座，今年就好可能要告一段落。