人生第一頂喼帽 30歲左閘雲度爾終於為巴西披甲 精選

英格蘭、巴西兩大豪強喺溫布萊球場對陣，三獅軍團以0-1小敗。國際友誼賽嚟講，賽果無關宏旨，練人試陣先係重點。而30歲巴西左閘雲度爾（Wendell），終於得到人生第一頂喼帽，喺呢個歐洲最大主場獻技，對陣英軍前線一堆明星，依然守得不失。

雲度爾喺歐洲嘅第一步，就係2014年加盟德甲利華古遜。當時嘅藥廠積弱已久，同而家呢支喺德甲騎住拜仁嘅黑馬完全唔同，當時佢嘅隊友包活奧馬托柏、查漢奴古、布蘭特、孫興慜等等，而嗰陣哥斯寧仲喺球隊嘅大佬。