彭馬上車大爆發 用實力證明£40M轉會費超值｜球員分析 精選

曼城青訓產品高爾彭馬（Cole Palmer）上季隨隊奪得三冠王，今季轉會到車路士，謀求生涯進一步發展。
彭馬喺所有比賽中攻入14個入球同12次助攻，包括今季英超聯賽中嘅11個入球同八次助攻，比孫興慜、沙拿等等巨星級球員更多，喺佢第一次成為一隊常規球員嘅賽季中，實屬難得。甚至搶得車路士十二碼劊子手嘅地位，今季5射5中，包括4-4絕殺母會曼城一球。啱啱週末足總盃八強，彭馬半場完之前變速突擊射入一球，之後再一個後踭助攻卓古美卡，協助車路士4-2淘汰李斯特城。

未夠一季就打出以上表現，足證彭馬決定去車路士係一個正確嘅決定。同樣嘅特質，曼城陣中喺菲爾科頓（Phil Foden）身上都睇得出，而上季科頓已經擠身絕對主力位置。作用同位置重疊，要生涯有所突破，謀求轉會都正路：「對我嚟講，呢次轉會係一個重大嘅轉變，我從來冇離開過曼徹斯特，甚至外借都冇試過。」
今季夏季轉會窗，彭馬喺閂窗死線前加盟車路士，基本轉會費£40M。縱使有三冠王榮譽加持，彭馬上季喺曼城機會唔多，呢筆轉會費顯得有啲多。但而家嘅發展，證明普捷天奴冇睇錯貨色。
彭馬係左腳仔，有速度有腳法，喺右翼位置出現得比較多，咁啱車仔陣中右閘正選占士、後備古斯度都係攻擊屬性極強嘅右閘，令彭馬有更多空間發揮。右翼、攻中、偽九號甚至左翼，彭馬都能夠勝任，令佢為球隊提供更多戰術多樣性，加埋冷靜嘅頭腦，令佢得以喺車路士呢支重建中嘅豪門之中，贏得一席正選位置。
喺前線挑戰對手，係彭馬嘅首要任務。而當有其他隊友比彭馬更適合衝鋒陷陣，彭馬就會褪後組織，再睇隊友配合，務求交出嚟致命一傳。車仔主力前鋒積遜今季到而家入咗9球，有4球就係嚟自彭馬嘅助攻。

今季嘅進步，令佢喺對上一次國際賽期，首次奉召參與大國腳集訓。而家三月國際賽期，英格蘭大軍都有佢份。以而家三獅嘅狀況嚟睇，彭馬要即刻喺暑假歐國盃搶得主力位置，似乎難度甚高。不過，擠身23人大軍名單，對彭馬嚟講都係一個合理嘅目標。