骨折康復又有新傷 紐亞撕裂內收肌，暫離德國隊 精選

抖完又傷？德國門將紐亞（Manuel Neuer）喺國家隊集訓受傷，目前已經退隊接受治療。

引用「喺德國國家隊嘅訓練中，紐亞左腳內收肌肌肉纖維撕裂，德國足總已經確認咗相關嘅徵狀屬實。呢位拜仁隊長會返返嚟慕尼黑，嚟緊對法國同荷蘭嘅比賽都會缺陣。」拜仁慕尼黑官方發出聲明，確認呢位37歲門將嘅傷情。

今個國際賽期，德國國家隊兩場友賽，3月23號打完法國之後，26號就會對荷蘭，一直到30號先會回歸返球會賽程。兩場雖然都唔係正式比賽，但對手嘅強度足夠，足以為暑假喺德國主場舉行嘅歐國盃備戰試陣。 巴塞隆拿嘅達史特根，應該會暫時頂上德國隊正選門將席位，但鑑於而家係友誼賽，主帥拿高士文會唔會比個機會富咸嘅蘭奴，或者賀芬咸嘅包文，就有待開波再觀察。睇返紐亞嘅傷病記錄，呢位德國隊長生涯雖然經歷過兩三次嘅長抖，但大致上都係一位能夠穩定出賽嘅門將。而今次都係佢第一次因為內收肌嘅傷患而缺陣，以往比較困擾嘅傷患，大多集中喺腳掌同小腿。今次受傷，未必會令佢再一次長期休養，但以佢37歲嘅年紀，都係要小心為上。

德國隊有唔少拜仁嘅球員，回歸球會賽程後硬仗連連，先後主場迎戰國內競敵多蒙特、作客海登咸，之後就要前往倫敦，出戰同阿仙奴嘅歐聯八強大戰。今季季初紐亞已經因為骨折未好返而缺陣，而家再一次傷出，對球隊影響甚鉅。
2022年冬季嘅世界盃，德國國家隊提早於小組賽出局，紐亞之後放假去滑雪嗰陣發生意外，導致腿部骨折，到2023年10月先復出，重新為拜仁把守大門。球會冇咗紐亞之後，就用低價買嚟慕遜加柏鋼門森馬，最終喺德甲下半季完成驚天大逆轉。
季後森馬冇留隊發展，但紐亞休養需時，拜仁決定用副選門將烏列治頂硬上。喺佢把關之下，除咗德國超級盃被RB萊比錫3-0痛宰之外，今季喺德甲同歐聯係未嘗敗績，預計會喺紐亞缺陣時繼續打正選。拜仁陣中仲有美列斯做三號門將，呢位以色列國腳今季先加盟，但隊中連烏列治都係長期副選，美列斯更加難有機會，佢而家更因傷長抖。
「當烏列治踢得好嗰陣，我真係覺得好開心。佢經常代替我把關，做得非常好，」舊年骨折長抖後，紐亞接受專訪表示，自己對烏列治有相當大嘅信心。