利物浦新飛閘冒起 巴特利希望做得更好

利物浦今季有多位年青球員上位，干拿巴特利（Conor Bradley）正正係其中一位。憑速度、活力同進攻本能，呢位年輕右閘食住阿歷山大阿諾受傷而得到唔少出場機會，更喺TAA轉型之際，為球隊提供更多右閘位置嘅風格，前途一片光明。

喺足總盃作客曼聯之後，就進入國際賽期，適逢北愛爾蘭而家喺曼徹斯特集訓，作為大國腳嘅巴特利就唔使特登飛嚟飛去。留喺曼市嘅巴特利，接受《SkySports》記者訪問，傾到今季嘅發展，以及佢早熟嘅國際賽生涯。
「對陣羅馬尼亞同蘇格蘭，對我哋嚟講，將會係一個好好嘅測試機會。」嚟緊北愛爾蘭會友賽作客兩場，巴特利表示，希望國家隊有多啲大賽經驗：「兩個國家喺歐國盃嘅晉級過程都做得好好，喺未來幾年，我哋都會以晉級為目標。」

巴特利早喺2021年已經首次為國上陣，目前有13頂喼帽。如果唔係今季上半季受傷，呢個數字有機會去到20，對一個年僅20歲嘅球員嚟講，國際賽經驗已經相當之豐富，喺國家隊更加係右翼、右閘兩個位置都有打過。

利物浦方面，巴特利早喺2021/22球季喺一隊亮相，喺盃賽有少少出場機會，之後一季被借到保頓，喺英甲吸收成年隊經驗，今季被高普回收。奈何巴特利季初受背傷所困，要到今年阿歷山大阿諾受傷長抖，先至喺球迷面前恆常出現。
而被記者問到邊個最難守，巴特利答「史達寧！」「喺對富咸嗰場波，我覺得韋利安好難守。而喺國際賽我哋對希臘，森美卡斯都搞到我成晚都好難踢。」
對佢嚟講，上述三位速度飛快嘅球員，都係屬於難以應對。而喺隊內，同巴特利球風最似嘅隊友，偏偏就係森林卡斯呢位出擊型閘位。
幾年前利物浦喺歐聯、英超奪冠，當時羅拔臣同阿歷山大阿諾雙閘齊飛，為球隊邊路開路，稱霸球壇。而呢兩位閘位而家都有少少轉型，羅拔臣喺後場組織時內收左中堅，阿歷山大阿諾更加漸漸成為中場一份子。反而利物浦而家標榜後上助攻嘅閘位，就係森美卡斯、巴特利呢兩位後備。

當然，如果考慮到後場組織形成三人組，高普會優先考慮比祖高美斯客串閘位，但當球隊需要更多側擊的話，就係巴特利出場嘅時間。