歐聯地標戰勇奪MVP 17歲古巴斯重現巴塞中堅風采 精選

傷患交纏嘅巴塞隆拿，喺週中歐聯以3-1擊敗意甲代表拿玻里。但比起利雲度夫斯基、簡些路、根度簡等等大球星，今場波更加耀眼嘅，係年僅17歲嘅中堅包古巴斯（Pau Cubarsí），佢今場係歐聯地標戰，堪稱定海神針，巴塞防線堅壁清野，呢位小將功不可沒。

巴塞今季雖然傷患連連，但未至於陷入中堅荒，不過沙維近呢個月變陣，將基斯甸臣推上咗防中位置，計埋固定串客右閘嘅高安迪，巴塞近日牌面十一人都有4個可以打中堅嘅球員。今季被提拔上一隊嘅古巴斯，新年後屢獲重用，場上顯示出超越年齡嘅領䄂特質，近日聯賽連續上陣9場，有份正選嘅8場全數不敗。

引用「古巴斯只有17歲，但態度似個老將。」上場聯賽對基朗拿賽後，領隊沙維大讚古巴斯：「佢單對單冇輸過，喺佢同位置中，上腳能力更加係隊內最佳。」

到咗歐聯，首回合沙維用返比較保守嘅中堅組合，恩尼高馬天尼斯＋朗奴阿羅祖，受制於拿玻里嘅壓迫，巴塞喺客場1-1被迫和。而而家確定傷咗柏迪同迪莊呢兩位中場大將，沙維更直接將球隊嘅傳控重心擺喺後場，因此重用經驗冇咁多嘅古巴斯，力求可以有所突破。

而古巴斯用表現回饋教練團嘅信任，今場傳球次數68次、成功率90%，都係隊內最高。佢出任左中堅，而球隊嘅組織都比較多集中喺左路，間接推高左閘簡些路上前支援，右路就有近日狀態大勇嘅翼鋒耶馬，能夠透過根度簡、盧比斯嘅轉移，拉散拿玻里防線後，偶爾比耶馬單兵突破。成熟嘅表現，令隊友能夠放心交波比佢，無懼拿玻里嘅壓迫。古巴斯唔係一味回傳同短傳，願意同其他隊友連結，甚至偶爾交出靈機一觸嘅長傳，直接推進攻勢。
如果唔係費文盧比斯喺鵝眉月處理不當，古巴斯就交出歐聯地標戰助攻。猶幸盧比斯兩分鐘後就喺差唔多位置開齋，令巴塞先開紀錄。 防守方面，古巴斯全場僅僅一次稍為笨拙嘅防守，差啲令巴塞輸十二碼，其餘時間古巴斯都非常淡定，同奧森漢纏足90分鐘。呢位拿玻里星級前鋒，全場只有1次射門，就係古巴斯嘅傑作。
喺碧基、艾巴、布斯基斯上季相繼退役同離隊之後，巴塞一段時間冇拉瑪西亞出身嘅後場球員，今季就有古巴斯，以及回巢嘅防中羅美奧。古巴斯First-touch、上腳表現出色，而且而家沙維要嘅足球概念，喺拉瑪西亞由細到大已經灌輸入腦，正正係巴塞隆拿體系之下，一個中堅應有嘅模樣，解釋到點解佢最近有咁多機會。

喺呢場非勝不可嘅淘汰賽，沙維決定冒險用人，成就古巴斯發揮嘅舞台。人生第一次打歐聯，賽後獲頒最佳球員，全隊都為佢感到高興。