力撐沙比下季加盟！前紅軍中堅：阿朗素好熟利物浦 精選

高普（Jürgen Klopp）提前宣佈季尾離隊，利物浦一個時代正喺度倒數，利華古遜教頭沙比阿朗素（Xabi Alonso），就被外界盛傳會回歸紅軍。曾經效力過利物浦嘅中堅馬田史基泰爾（Martin Škrtel），力撐沙比會係一位適合擔任紅軍新主帥嘅教頭。

「睇佢哋比賽嘅情況，睇佢哋對比賽嘅統治力，即使面對拜仁這樣嘅強隊，都交出令人驚喜嘅表現。我哋見到沙比對足球嘅理解有幾深，隊波時時刻刻準備好接受挑戰。」
今季利華古遜成為歐洲最強黑馬，目前以10分之差領先班霸拜仁慕尼黑，極有機會打破拜仁嘅連霸走勢。作為主帥嘅沙比阿朗素，今季堪稱最受關注嘅教頭。 史基泰爾曾經喺利物浦同沙比合作過一季半，非常睇好呢位舊隊友：「作為一個領隊，佢仲後生，但已經好成功。我為佢感到非常高興，希望佢能夠繼續keep住落去。」

「佢啱唔啱呢份工，由利物浦老細去決定。但佢為利物浦效力過，佢熱愛呢支球會，熱愛呢座城市，沙比有好多優勝於其他人嘅地方。」

「我認為非常重要嘅一點，係佢對球會有深入嘅了解，作為新球員或者新教練，嚟到利物浦並不容易去適應。呢度好特別，背負住好大嘅壓力去贏獎盃。」史基泰爾認為，沙比曾經效力過利物浦，呢一點對佢將來競爭紅軍主帥一職嚟講，係一個競爭嘅優勢。[/img]身在兩個時代之間嘅黑暗時期，史基泰爾嘅球會成就，當然唔及謝拉特、阿朗素等等名宿，更遑論雲迪克、沙拿等等當今紅軍英雄人物。高普2015年年底執教利物浦，史基泰爾喺幾個月後就被賣走，之後嘅歐聯、英超等等冠軍，佢都冇參與到。2021年退役之後，亦都冇好似沙比阿朗素咁教波。

「聽到高普話佢要走嘅時候，我有啲震驚。」上年新加坡季前賽，史基泰爾有同高普見面：「當時佢態度好積極，感覺好似一個新時代嘅開始。」

「但做領隊做咗近 25 年，唔係一件容易嘅事。唔止係訓練同比賽，仲有比賽分析、隊內會議、人員招聘等等細節。佢真係攰啦，需要休息。」 高普決定離隊之後，今季第一個獎盃英聯盃都已經到手，目前仲有足總盃、英超、歐霸盃三條戰線。史基泰爾話，尊重高普離開嘅決定。