【曼市打吡】做得半場英雄，世界波拉舒褔特仲未脫離低迷

如果曼聯上半場嘅走勢可以維持到尾，或者能夠清洗大部份質疑，一球世界波中鵠嘅主將前鋒拉舒褔特（Marcus Rashford），更加係三分全取嘅英雄人物。拉舒福特一直冀望能夠掃除外界質疑，今日一球世界波帶領曼聯領先，奠定咗佢哋上半場比較優勝。

但可惜，但足球始終係90分鐘嘅比賽，下半場曼城節奏控制了當，科頓（Phil Foden）兩球靚波反cup成功，最後由夏蘭特錦上添花。呢場曼市打吡笑到最後嘅，都係技高一籌嘅曼城。
作為主力前鋒，拉舒福特半季過後只得5球進帳，狀態低沉。領隊坦赫（Erik ten Hag）為佢百般辯解，佢自己喺賽前都向球迷喊話。開波8分鐘曼聯一個反擊，拉舒褔特就以一腳禁區外妙射為球隊領先，全場曼城球迷目瞪口呆。

呢球波，顯示出拉舒福特能力尚在，技術、鬥心、身體質素等等範疇，都值得喺曼聯陣中取得一席地位。不過，曇花一現嘅表現，唔足以為曼聯取得長期嘅成功。

呢場波嘅主軸都係由曼城主宰，喺曼聯嘅半場持續施壓，失去球權後再加以反搶，曼聯嘅反擊攻勢唔算多。曼聯核心球員般奴費南迪斯（Bruno Fernandes）今場波客串「偽九號」，主要目標係引嚟曼城中堅迪亞斯（Rúben Dias）對位，再靠分居左右嘅拉舒福特同加拿祖喺速度上突破史東斯、卡爾獲加、尼敦艾基等等後衛，直接面對曼城龍門艾達臣。整體而言，Rashford嘅表現確實有啲失色，特別係下半場再冇辦法貢獻上半場喺反擊攻勢嘅銳利度，箇中原因可能同傷勢有關。週中足總盃對諾定咸森林嘅比賽，拉舒褔特一次闖入禁區時被包夾，引發受傷疑慮。兩場比賽之間嘅操練，佢有到齊。但據《The Athletic》報導，曼聯隊醫奧迪斯高（Gary O’Driscoll）之所以由上半場中段開始一直企喺場邊待命，正正係因為隨時準備拉舒褔特嘅傷勢。
而下半場開始十分鐘，Rashford獨闖禁區頂被獲加掂到膊頭，球證冇吹罰，直接令曼聯一個反擊過返曼聯半場，再靠科頓一球世界波扳平比數。
睇返《FBref》嘅統計，拉舒褔特全場2射1中（就係世界波嗰球），無持球過人嘅表現。而僅僅8次嘅傳球成功，同埋22次嘅掂波，更加係佢今季英超有正選上陣嘅比賽之中最低嘅一場。
呢場波去到尾，Rashford踢咗75分鐘被安東尼入替。作客球迷對佢報以掌聲，當然係答謝佢上半場嘅世界波，令曼聯意外領先，而當時曼聯仲係1-1平手。但無可否認嘅係，呢球波掩蓋唔曬佢全場嘅低迷。