【失意紅魔鬼】一億安東尼持續低迷 坦赫袒護：我清楚佢能力去到邊 精選

曼聯翼鋒安東尼（Antony）上季表現不如人意，今季本應要力爭上游，撇除先前嘅家暴傳聞，喺健康嘅前提下，安東尼表現依然低迷。
坦赫（Erik ten Hag）2022年夏天由阿積士加盟曼聯，趕喺轉會窗結束前簽入曾經合作過兩年嘅安東尼，轉會費高達£82M，連同附加獎金就超過一億歐元。當時嘅要價之所以咁高，原因在於佢喺阿積士受坦赫教導之時，前場進攻效率非常高，運球、創造機會等等嘅數據都喺荷甲名列前茅。

安東尼嚟到曼聯之後，加盟開初嘅幾場比賽有入波，但之後就低迷到而家，喺助攻方面嘅數據，甚至不及被坦赫冷落嘅辛祖。據OPTA嘅數據，雖然安東尼喺防守方面表現唔錯，滿足到坦赫對迫搶嘅需求，但進攻方面，喺所有比賽平均90分鐘都交唔到0.1次助攻，而辛祖喺上季平均有0.23次。

嚟到今季，辛祖（Jadon Sancho）被打入冷宮再被借走，安東尼理應能夠喺右翼位佔有更多上陣時間，但係就曝露出更多決定上嘅問題。上季嘅安東尼，平均有1.8次帶波後射門，今季得0.9次，啱啱好對半。「安東尼係健康嘅，但係我哋喺右翼位置有好多選擇，而其他位置因受傷而缺乏選擇。安東尼嘅表現我哋都見到，佢真係要加油。」上一場對富咸，小將科臣被提拔右翼正選，安東尼只有補時後備上陣時間，只能眼睜睜睇住曼聯以1-2喺主場輸波。曼聯領隊坦赫表示，安東尼要為主力地位而努力，加拿祖、迪亞路等等小將競爭。
坦赫表示，唔放棄安東尼嘅其中一個原因，係因為佢心態好勇敢：「佢要重拾自信，我哋球會上下都會支持佢，作為領隊，我對佢投下信任一票。」縱使千夫所指，坦赫依然表示，自己清楚安東尼嘅能力。
安東尼今季各項比賽出場26次，只有1個進球、1個助攻嘅表現，嗰球仲要喺上個月足總盃對英乙球會紐波特郡所入。而除咗呢場比賽之外，佢喺2024年仲未有正選機會。要交出符合佢一億身價嘅表現，似乎仲有漫漫長路。