神鋒變鈍？曼城主場被迫和，夏蘭特對車仔失射門鞋 精選

周末英超賽事，車路士喺曼城球場發揮超出預期嘅水準，令主場出擊嘅曼城處處受制，打出一場漂亮嘅1-1和局。藍月亮中鋒夏蘭特（Erling Haaland）一再努力，依然冇辦法為球隊入波，被視為丟失兩分嘅主因之一。
今場對車路士嘅比賽，因為中場冇貝拿度施華（Bernardo Silva）同史東斯（John Stones），球隊中場同後場之間嘅連結變得遲鈍。呢個時候，一個識得後撤中場，能夠輔助中場組織嘅偽九號，就能夠彌補返中場質素嘅不足。
曼城神鋒在陣但久攻不下，反而車路士前鋒失機頻頻下，依然趕得切喺半場前領先1-0。隨比賽時間一點一滴流失，曼城距離三分盡失愈嚟愈近。哥迪奧拿換入施華，改善中場嘅平衡性。同時，車路士變陣5-3-2開始縮後防守，曼城後場壓力冇咁大，令卡爾獲加開始喺右路衝前助攻（阿簡治逗返右中堅嘅位置），右翼嘅科頓就拉返入中路，令夏蘭特冇咁孤軍作戰。

雖然話曼城中場組織有啲問題，但至少比到夏蘭特一定程度嘅輸送，不過，呢位挪位神鋒全場9射2中門，xG值高達1.6嘅情況下冇任何入球。另外，車仔中堅迪沙斯（Axel Disasi）今場交出MOTM等級嘅防守表現，都係曼城久攻不下嘅原因之一，試過喺夏蘭特起腳之前就精準出腳。
夏蘭特喺前線入球如麻，但組織上嘅功夫就不如艾華利斯（Julián Álvarez），更遑論以前根度簡在陣嘅時代，佢同迪布尼輪流客串偽九號時，球隊上下行雲流水嘅模樣。身在中場嘅艾華利斯，反而因為冇中鋒打而有所削弱，打唔出過往幾個月以嚟，夏蘭特缺陣時嘅狀態。甚至令人懷疑，有時係咪應該比夏蘭特休息一吓，比機會「蜘蛛仔」喺九號位擔正一下？

不過要知道，夏蘭特過去幾個月傷吓踢吓冇乜入波，到而家依然係英超射手榜嘅榜首（16球）。即使佢喺禁區外串連球隊嘅能力比較弱，未必時時能夠滿足哥迪奧拿喺組織方面對中鋒嘅需求，但係佢嘅入球效率話比大家聽，自己喺門前價值，能夠令哥迪奧拿放棄一部份對組織嘅堅持。

但要做到呢一點，前提係中場組織能力足夠。今場打車仔，正選冇施華、史東斯，當然做唔到呢一點，而夏蘭特亦碰上狀態上佳嘅迪沙斯。各項因素加埋，造成夏蘭特今場波嘅失態。