拜仁德甲歐聯連輸 簡尼「黑氣石」屬性會延續幾耐？ 精選 推薦

先喺德甲輸咗場榜首大戰，再喺歐聯首回合失利，拜仁今個星期兩場敗仗，分分鐘注定哈利簡尼（Harry Kane）嘅生涯冠軍荒，今季會延續落去。
21場德甲攻入24球，外加歐聯小組賽6場4球，簡尼嘅入球效率冇因為轉換環境而降低，集組織、串連、射門於一身嘅特性，喺拜仁依然能夠得以體現。拜仁上季因為冇頂級中鋒，其他進攻球員受到嘅防守壓力相對大啲，呢個問題隨住今季簡尼嘅加盟得以緩解。

但對利華古遜嘅榜首大戰，簡尼全場表現失色，失去上文所提到嘅作用。據FbRef嘅數據，呢場波簡尼全場得17次掂波，當中12次嘗試傳球、1次起腳射門，比起全季平均低好多。喺沙比阿朗素嘅防守陣容之下，簡尼帶領嘅鋒線可謂隱形。
當然，拜仁今季嘅失態，唔能夠怪喺簡尼一個人身上。甘美治、格拿比、哥列斯卡、金玟哉、戴維斯等等隊友，喺各自位置上都算係德甲頂級之一，但將佢整合成一支有能力爭冠嘅球隊，就係領隊杜曹（Thomas Tuchel）嘅責任。

拜仁嘅問題，已經唔係一季半季。上一代功臣諸如利雲度夫斯基、紐亞、梅拿、蘇利等等先後退化同出走，拜仁嘅實力已經漸漸消減。 由前季歐聯八強被維拉利爾爆冷踢出局，到上季德甲要靠多蒙特「衰收尾」，以及梅斯亞拿喺煞科戰絕殺入球，先成功衛冕德甲，顯示佢嘅已經唔係嗰支霸氣外露嘅無敵球隊。

呢個漸漸衰落嘅時代，遇上決心要離開熱刺嘅簡尼，令拜仁能夠延續對未來嘅希望。簡尼決定轉會嚟到新環境，翻開職業生涯嘅新一頁，但今季喺聯賽嘅走向，似乎又令佢回想返往年喺熱刺時嘅失望。
拜仁喺德國盃早就出局，今季德甲又有利華古遜嘅強勢，歐聯戰線又被拉素先下一城。我哋姑且做最壞打算，今季拜仁可能空手而回，簡尼「黑氣石」嘅名號可能會延續落去。但係，簡尼下季先至31歲，同拜仁嘅合約仲有3年之多，巔峰年紀仲未過。
而換個角度思考，如果連簡尼呢個級數嘅球星加盟，都冇辦法為球隊延續強勢。咁係咪代表，買人唔係解決問題嘅唯一辦法呢？
如是者，之後拜仁就要好好處理壓力，比簡尼、金玟哉呢兩位攻守兩端嘅全新核心，多啲時間去適應新嘅聯賽同球隊嘅節奏。