贏得唔夠！全陣曼城「僅勝」哥本哈根3-1｜比賽分析 精選

歐聯十六強首回合，衛冕軍曼城作客3-1擊敗黑馬哥本哈根，結果看似合理，但哥本哈根嘅適時調整，令曼城無法將優勢發揮到最大。哥迪奧拿用最強陣容出擊，但勝局唔算鎖得太穩定。
曼城以中路立陣，將哥本哈根嘅防守陣型收窄，推上前場後再刻意由邊路拉散哥本哈根，令迪布尼、施華可以喺閘位同中堅之間嘅空位前插搵食。迪布尼10分鐘開齋一球就係咁嚟。

落後一球之後，哥本哈根決定進一步加強防守，兩翼進一步後退mark緊曼城閘位，令兩肋嘅中場可以收得更緊密，防止迪布尼、施華偷襲half-space。呢個做法，寧願放棄反擊時嘅速度，都要先鞏固好防守，始終兩回合制嘅比賽，落後1球仲有價講。
調整陣形之後，哥本哈根開始出發，咁啱曼城有基利殊傷退。己隊主場優勢，加上對手陣勢稍亂，上半場20幾分鐘開始到完半場雞之間，係哥本哈根打得最好嘅時間，全場4次射門，有3個係喺呢段時間發生。艾達臣一個失誤，令哥本哈根嘅麥臣（Magnus Mattsson）扳平1-1。

面對實力唔強嘅對手，曼城可以打出更強嘅中路嘅組織，令哥本哈根4-3-3/4-5-1嘅防守陣型要更緊密地縮喺中路，左右閘艾基、獲加有更多適時插上嘅空間。

而哥迪奧拿都作出回應，開始指示迪布尼放棄half-space而走向左路，配合入替基利殊嘅杜古形成單邊overload，終於喺半場雞前追返球，再次領先。

而隨比賽時間走向尾聲，曼城一直久攻不下，令哥本哈根愈嚟愈大膽前壓，可惜結果未如人意，反而迪布尼唔喺左路嘅時間，就同右路科頓之間嘅連結，喺補時階段修成正果，以3-1優勢完結首回合。哥本哈根係今季歐聯小組賽最大嘅驚喜，力壓兩大歐聯常客搶到第二名出線。但黑馬之所以係黑馬，正因為佢哋作為弱旅嘅本質。曼城對哥本哈根全陣出擊，都只能「小勝」兩球，其中兩個入波係補時攻入，換個角度諗，都唔算係有完完全全壓制呢支弱旅，令佢哋喺次回合仲有些少爆冷嘅懸念。