馬斯亞開刀預季後離隊 九年曼聯生涯每況愈下 精選

由當初活力十足、爆發力強、甚至被稱為「新亨利」嘅鋒線新星，到而家已經係表現不穩、成日派膠、傷患連連嘅負資產，馬斯亞（Anthony Martial）喺曼聯呢九年，每每嘗試想證明自己唔係冇用嘅時候，都會被各種理由打回原型，最終爭唔過隊友，再次淪為曼聯大後備。

2024年一開始冇耐，馬斯亞就接受腹股溝手術，確定休息到至少四月。佢同曼聯六月底就完約，復出後已經冇乜時間證明自己，佢近年嘅表現亦唔足以說服球隊比佢續約，幾乎可以確定馬斯亞嘅紅魔生涯已經告一段落。
[/img]回想起2015年季初，曼聯以£36M由摩納哥買入呢位年僅19歲嘅天才鋒將，處子戰就喺「雙紅會」攻入埋齋一球，到而家依然係記憶猶新。佢嘅第一步爆發力可以牽動對方防線之餘，接球後first-touch都比同齡球員更穩定，令外界對佢將來發展期望甚高，配合盤球同射門能力，令人覺得佢有亨利嘅影子。

馬斯亞嚟到曼聯嘅第一季聯賽攻入11球，足總盃戰線亦以冠軍作結，但球隊維持前四嘅目標冇達成到，導致佢嘅伯樂雲高爾離隊。之後名帥摩連奴入主曼聯，接連引入伊巴謙莫域、盧卡古等等星線中鋒，加上新人拉舒褔特嘅掘起，馬斯亞唔單止被奪去9號波衫，場上位置慢慢向左翼調整，更睇重佢用以撕開防線嘅腳下功夫。
但踢法改變嘅同時，馬斯亞嘅無球走位方面一直冇乜長進，令佢當初嘅光芒漸漸消減，留喺前線靠後嘅位置等隊友比波，但冇辦法幫球隊延續攻勢。
2019-20球季開始，領隊蘇斯克查比馬斯亞同拉舒褔特組成新組合，加上嗰季有般奴加盟，令馬斯亞一度起死回生。但同時傷患亦接腫而來，臀部、膝頭等等部位全部傷過，一步一步削減埋佢原有嘅速度。冇速度又冇走位，馬斯亞上陣時間愈嚟愈少，射門觸覺自己愈嚟愈弱。
馬斯亞冇兌現當初嘅期望，反而整整九年生涯每況愈下，球隊要將佢變賣套現嘅聲音始終不斷。2018年夏天《衛報》就報導過，摩連奴有意賣走馬斯亞，但報價合理先會放人。而喺坦赫嚟到之前嘅半季，馬斯亞被借去西維爾，但西甲一球都入唔到，自然冇人要。

由當初光芒四射，到而家黯然下台，馬斯亞喺曼聯嘅足球生涯，無疑係一次失敗。