「我想為高普效力」利物浦名宿艾加：球隊已重回正軌

作為球員，當然喺球隊最風光嘅時候參與其中，奈何總有生不逢時嘅悲情人物，只能慨嘆命運嘅捉弄。
高普2015下半年嚟到利物浦，當季亦係丹尼爾艾加（Daniel Agger）職業生涯最後一個球季。喺高普帶領下，利物浦喺2019、2020年連續奪得歐聯、英超冠軍，喺聯賽同曼城形成雙雄並立嘅形勢。

「我有少少妒忌，因為我想成為而家呢隊利物浦嘅一份子。」喺《The Athletic》嘅專訪之中，艾加直接表達出自己對高普嘅尊敬：「我直接講，高普係我會想為佢效力嘅領隊，」

「受到批評之後，我往往會做得更好，得到讚賞之後反而唔會。」艾加好尊敬高普嘅領軍方式，佢話如果訓練嘅時候往往只有正面嘅feedback，就唔會有團火比佢繼續進步。「有人批評我，我就會心諗：我會證明你係錯嘅。」艾加同謝拉特、加歷查、沙比阿朗素等等名宿一樣，從來未為利物浦贏得聯賽錦標，但喺球迷心中有極大份量嘅人物。可惜嘅喺，艾加喺2006年冬季先至加盟利物浦，2005年歐聯冠軍嘅旅程並冇佢份。8年半嘅紅軍之旅，唯一有落袋嘅，只有2012年嘅聯賽盃冠軍（另有2006年社區盾）。

20歲之齡為丹麥勁旅邦比奪得丹超聯冠軍，半年後征戰英超。艾加回憶起呢一段，佢話當時愛華頓領隊莫耶斯都對佢有興趣，但最後不了了之。喺利物浦效力嘅後期，艾加有機會轉會去巴塞隆拿，可惜嘅係，2013年利物浦由少帥羅渣士執教，佢並冇重用艾加，令艾加以29歲之齡重返邦比。
「我由副隊長，降到中堅位置嘅第4、5選擇，當時真係好嬲...但當時我覺得自己生涯已經去到盡，係時候要掌握返喺自己手中。」回歸邦比只有2年時間，艾加高掛球靴，年僅31歲，退役得相當之快。
退役之後，艾加參與大大小小嘅慈善項目。同足球最有關聯嘅，係兩年前成為丹麥次級聯賽HB Køge嘅領隊，帶隊到今年夏天離職。艾加話，呢隊波嘅野心漸漸消磨，自己呢兩年領隊生涯，目標由升班變成護級。「好好嘅經驗，令我學到有咩係work嘅，有啲咩係唔work嘅。」
利物浦今季大換班，「Klopp 2.0」時代已經啟航，喺換班嘅過程之中，上半季踢出亮麗嘅表現，個新世代核心喺短時間之內成功融入體系，雲迪克、沙拿等等功臣雖然有微幅下滑，仍然不失世界級球星嘅風采。新舊並至，利物浦半季時間就返到英超爭標嘅行列之中，18輪聯賽後僅以1分落後於榜首阿仙奴。

「呢隊波已經有返佢哋應有嘅模樣：為錦標而戰。」喺艾加心中，利物浦已經脫離低迷，重回正軌。