身兼右閘及中場 - 阿歷山大阿諾的轉型｜球員分析 精選

年紀輕輕就成名於世，阿歷山大阿諾（Trent Alexander-Arnold）20歲左右就為利物浦贏得榮譽，作為右閘嘅佢本身就有高於平均水平嘅腳法，為佢提供日後位置轉型嘅條件。到咗而家25歲，喺利物浦組織時已經習慣喺中場出現，呢個轉型，更為佢迎嚟國家隊更多嘅可能性。

環顧英格蘭咁多球星，盤傳皆精嘅右閘比比皆是，亦有具備一定防守能力而不失速度嘅中場，但偏偏得阿歷山大阿諾喺呢兩個位置鶴立雞群。能夠兩者合於一體，關鍵在於意識，喺攻守轉換嘅一刻（尤其是由攻轉守）嘅本能反應轉唔轉得切，同埋當刻有冇做最好嘅判斷，好影響佢會唔會成日失位。
喺利物浦，當前場被對手攔到波而形成反擊嘅時候，阿諾嘅任務係退返右邊，補返四人防線。但喺英格蘭，佢就要喺懷斯嘅保護下，喺右邊half-space進行壓迫。

英格蘭喺十一月兩場歐國盃外圍賽「太公波」，阿歷山大阿諾以中場嘅身份幾乎踢足，4-3-3嘅右中場、4-2-3-1嘅防中佢都試過。喺記者面前，阿歷山大阿諾表示想正選，主帥修夫基都成日擺佢喺中場。雖然對手實力弱，但阿歷山大阿諾表現出嚟嘅意識，足以顯示佢能夠出任呢個位置。
當然，佢有而家嘅轉型，受惠於呢兩季嘅利物浦，有條件比佢發揮呢方面嘅潛能。羅拔臣（Andrew Robertson）能夠內收左中堅進行組織嘅前提下，高普放心比阿歷山大阿諾內收中場。發揮進攻時嘅判斷力，以及長傳功架。阿歷山大阿諾雖然係後衛出身，但攞到波之後都唔會過於保守，佢第一時間諗嘅係點樣帶住個波離開被圍攻嘅中場，延續攻勢。

雖然話而家轉打中場，但唔會話浪費咗佢以往打右閘嘅速度。要知道，佢打中場嘅目的係令球隊中後場嘅組織更加順暢。而個波運上三閘線後，利物浦可以安排一個中場堅守禁區頂嘅位置，而阿諾就由中路斜跑返去右路，幫球隊製造多一個右路嘅出波點。考慮到佢位置推前會為球隊後場帶嚟防守隱憂，呢一招相信喺要遠藤航同場比賽嘅時候，先會比較多機會見到。

如果對手以mid block嘅陣型進行壓迫，阿歷山大阿諾同麥亞里士打呢對中場雙核，就會面臨對手中鋒同凸前中場嘅同時壓迫。呢個時候，蘇保斯禮嘅褪後支援，就可以幫阿歷山大阿諾解放壓力，而上述三個球員，都有水準以上嘅長傳功夫，能夠配合迪亞斯、沙拿等前鋒，趁對手壓迫而形成空檔嘅時候，配合完成長傳突擊。
而家嘅利物浦中場，具備吸引對手中場加以佈防嘅條件，加上右翼沙拿仲未有大幅度衰退，即使阿諾喺利物浦打返早幾年純粹喺右路快上快落嘅右閘，依然能夠交到表現。

而家距離歐國盃仲有半年有多，喺利物浦呢下半季，就係比阿歷山大阿諾將自己嘅特殊位置練得更純熟，以確定自己能夠成為比寧咸、懷斯以外嘅第三個中場人選。