多蒙特強壓AC米蘭 亂流下取勝上首名 精選

要喺歐聯死亡之組突圍，球隊上上下下點都有壓力，猶其是打到第4輪，各支球隊都係相差1分嘅情況，令比賽形勢更見刺激。好就好在，AC米蘭週中嘅佈置，被多蒙特成功壓制，加上小將臨危受命之下，成功為球隊注入活力，令多仔成功「鹹魚翻身」，喺死亡之組提早晉級。
多蒙特喺國際賽期前輸比史特加，嗰場波有23歲中場尼美查（Felix Nmecha）臀部受傷抖到年底，佢喺第3輪對紐卡素射入決勝一球，一直係多仔今季嘅主力球員之一。主帥泰錫（Edin Terzić）決定變陣，提拔年僅19歲嘅翼鋒拜奴基騰斯（Jamie Bynoe-Gittens）上正選陣容，週末聯賽打吡戰交出1入球1助攻，到歐聯第5輪繼續靠佢爆發，同快翼馬倫（Donyell Malen）雙翼齊飛。

開波早段已經非常刺激，10分鐘已經有兩個十二碼判決。多蒙特先因為手球而被罰，但喺基奧特射失，之後拜奴基騰斯突破卡拉比亞，為隊長萊斯（Marco Reus）搏得十二碼，多蒙特取得領先。
兩邊都唔算穩扎穩打，反而亂流居多。面對AC米蘭刻意打開球場闊度嘅踢法，多蒙特盡量將陣型收縮喺中路。後防大將曉姆斯（Mats Hummels）更加係一夫當關，面對8次盤扭，7次攔截成功，全場發揮防守指揮官嘅角色，以身作則封實AC米蘭嘅進攻路線，迫得主隊多次未深入腹地就魯莽施射，白白浪費機會。

AC米蘭今場唔太重視對中場嘅控制，主要利用閘位嚟為翼鋒製造空間，但呢個好依賴球員質素嘅踢法，今場收唔到成效，變成所謂「天才波」。右翼卓古斯8次盤球4次成功，左翼佩利錫5次盤球全部失敗。基奧特盡量輔助隊友推進，效果亦好有限。
雖然全場失咗3球，但米蘭嘅防守冇進攻咁肉酸，有路夫斯捷克（Ruben Loftus-Cheek）喺前面迫搶同預備反擊，雙防中做好保護防線嘅本份。多蒙特中路球員來回換位，都難以搵到好嘅射門空間。

不過，多蒙特中場嘅分工做得更精細。今場打攻中嘅萊斯會逗深少少，引嚟對手中場向前迫，再借助沙比薩、舒洛達碧克嘅長傳功夫，透過兩隻快翼將個波一腳推上前場。大隻中鋒富卻古（Niclas Füllkrug），有好好運用自己嘅身體對抗方面嘅優勢，加上判斷到隊友嘅腳步，為下半場兩個入波製造機會。

由開局1和1負，到而家第3輪比賽就成功晉級，當中更失去主力球員。少帥泰錫喺用人方面嘅斷決，成功為球隊扭轉局勢。最後一輪面對巴黎聖日耳門，只要輸少過兩球，就可以保證F組首名。