【利物浦】加盟首季閃耀英超 - 全能中場蘇保斯禮 精選

以£60M嘅轉會費，換嚟球隊下一代嘅中場核心，利物浦購買蘇保斯禮（Dominik Szoboszlai）嘅呢單deal，絕對可以列入今季英超最佳收購之一。
近年嘅紅牛體系產出過唔少精兵，先唔講而家已經稱霸英超嘅夏蘭特，上季離開利物浦嘅英雄級人物文尼，喺嚟到英超之前都係喺薩爾斯堡紅牛踢咗兩年，之後被利物浦由修咸頓手上購得，喺高普手下成就一身功名。近少少嘅，南野拓實雖然有啲失意，但以£7.25M買入，£15.4M賣出，起碼有啲數字上嘅加成。

蘇保斯禮喺兩支「紅牛球隊」練成一身全能中場嘅意識同本領，喺高普賴以成名嘅壓迫體系之中得以發揮，持續以高效嘅表現，打出亮麗嘅數據，為球隊喺聯賽保持競爭力。

喺而家嘅利物浦打中場，不計氣力嘅跑動，同埋對壓迫時機嘅判斷，都係缺一不可嘅元素。蘇保斯禮加盟後活力四射，身在利物浦中場無處不在，同你迫到比賽末段都仲得。

願意跑動，反應敏銳，技術上乘，喺中場腹地頂住壓力保住球權，馬上搵到最好嘅傳球時機，喺面對僵局時大腳轉邊，串連進攻嘅功架，甚至禁區頂嘅遠射腳頭，蘇保斯禮都甚有佢件8號波衫嘅傳奇人物，前利物浦隊長謝拉特嘅影子。
初戰英超第一季，前10場比賽冇缺席任何一分鐘，對維拉大勝3-0一役攻入英超處子球，對韋斯咸贏3-1之戰禁區外chip靚波比越位少少嘅鍾斯入楔，差少少就交出處子助攻。到第10輪比賽主場大炒諾定咸森林3-0，蘇保斯禮更交出2個助攻。

到而家合計13輪比賽，蘇保斯禮全數正選，對球隊轉型嘅重要性不言而喻。只計英超數據，佢帶35次波入三閘線，為隊友創造56次射門機會，連帶接波、掂波（甚至係前三閘線掂波）嘅數據，都係利物浦隊內為列第一。

年僅23歲，就要喺一支近代取得成功的球隊之中，成為球隊轉型嘅全能中場核心，蘇保斯禮加盟利物浦後嘅任務一啲都唔簡單。以而家嘅發展嚟睇，無疑開咗個好頭。