【大炒愛華頓】用雙腳跑出價值！曼聯小將文奴表現活躍 精選

曼聯作客3-0大炒突然深陷降班危機嘅愛華頓，一場波嘅勝利，唔代表佢哋馬上脫離咗谷底，但呢場波打起咗高比文奴（Kobbie Mainoo）呢位18歲青訓小將，為領隊坦赫（Erik ten Hag）喺中後場嘅傷患潮之下，得以暫時點亮前路。

從數據睇，呢場波文奴上陣71分鐘，掂波57次，隊內掂波次數比佢多嘅，全部都踢足90分鐘，而且最多都係68次嘅連迪路夫，可見文奴嘅活躍程度有幾高。而從表現睇，文奴今場主要出任輔助隊友嘅角色，球隊由後場組織時，逗深防中位幫助門將奧拿拿傳控。
愛華頓嘅4-4-1-1陣式，雖然有兩個實淨嘅中場，但杜古利喺防守時會同中鋒卡法路雲形成第一線，壓迫曼聯嘅雙中堅。文奴嘅工作，就係喺愛華頓前線球員man-mark緊曼聯後防球員之時，搵出空位接波，轉身幫隊友解壓。
如果坦赫要保守啲，喺後場猜吓猜吓再搵拉舒褔特突破，咁佢大可以比安拉拔打正選，起碼可以鞏固防守。不過，文奴嘅賣點係推前嘅意識好強，接波後唔會一味後傳，推上前場後亦會瞄住禁區空位後上，增加球隊嘅接應點，令般奴可以專心喺禁區前面造波。另外，佢都有同拉舒褔特打one-two嘅畫面，無球時不斷搵位走。

今場波佈置上，坦赫都花咗啲心思。因應梳爾（Luke Shaw）復出，曼聯左路活力大增，今場嘅4-2-3-1，安排文奴同麥湯文尼（Scott McTominay）一齊打正選。正如上文所講，組織時文奴企喺中路，麥湯文尼就喺右邊出現多啲，吸引愛華頓成個陣型向曼聯嘅右邊傾斜，一旦要大腳轉邊去左路突破，梳爾就會面臨少啲嘅壓力。
坦赫今季買入車路士中場蒙特，一心諗住比佢同般奴、卡斯美路組成壓迫力強大嘅中場三角，但而家卡斯美路會抖到年尾，蒙特又未融入到。文奴有呢場波嘅省靚個CV，有機會就咁上位，同麥湯文尼一齊頂住先。

作為2022年青年足總盃冠軍得主，文奴上季已經坐陣一隊，主場大炒李斯特城嘅比賽後備上陣，完成處子戰。到今季季前賽得到表現機會，可見文奴喺一隊嘅地位一直提高緊，尚差一個證明自己嘅舞台。可惜季初曼聯遭遇傷患潮，文奴都係其中之一，對皇馬遭遇膝傷後，抖到十月先喺歐青聯復出，到呢場波作客愛華頓上演英超地標正選，為曼聯中場引入今季以嚟缺乏嘅活力，一炮打響名堂。