從外圍賽十戰十勝 看葡萄牙改變的雛形 精選

由之前帶領球隊贏得歐國盃嘅山度士，交由而家馬天尼斯（Roberto Martínez）執教，葡萄牙以十戰十勝，100%勝率嘅姿態，晉身下年歐國盃決賽週，氣勢迫人。

當然，葡萄牙喺外圍賽咁好嘅戰績，有賴佢哋抽到靚簽。J組嘅對手最強已經係斯洛伐克，其餘冰島、列支敦士登、盧森堡、波黑等等都算係魚腩部隊。比起英格蘭、意大利、烏克蘭所在嘅C組、西班牙、蘇格蘭、挪威在嘅B組，葡萄牙喺J組競爭唔算大。

但踢得外圍賽，隊隊都會全力以赴。而呢個戰場，亦葡萄牙改變嘅開始。歐國盃外圍賽貫穿成個2023年，一整年嘅時間，馬天尼斯好快就改變咗以往山度士以防守為優先嘅足球哲學。山度士好重視緊密嘅防守陣型，等待對手犯錯，喺中後場重奪球權之後，用更直接、傳球數更少嘅攻勢嚟運返個波上前場。
相比起嚟，馬天尼斯更重視控球在腳，陣型向前推嘅同時，喺中前場反搶球權馬上再攻。防守觀念上，佢用嘅球員要勇於上搶，而唔係一心諗住回防佈陣，先可以第一時間做到佢要嘅效果。
兩位教頭喺基本概念上，已經存在好大嘅分別，要喺一次大賽之中就完成球隊轉型，難度頗大。好就好在，葡萄牙嘅新舊交替做得幾好，正值當打之年嘅球星，諸如般奴費南迪斯、貝拿度施華、簡些路等等，本身風格多變，能夠配合球隊嘅探索同轉型。而有佢哋喺度，唔單止輔助菲歷斯、達洛治、利奧等等準備接班嘅球員快速融入新體系，更可以減少C朗喺前面嘅負擔。
外圍賽對手咁弱嘅情況下，C朗都正選咗9場，攻入10球嘅佢，更加係呢輪外圍賽入球榜第二名。確定晉級後，十一月兩場「太公波」，C朗都係正選出戰，可見佢要融入新體系嘅決心有幾大，誓要喺出年以39歲之齡，第二次奪得歐洲國家盃。

事實上，而家嘅葡萄牙有人拉到邊，有人造到波，中場組合變化甚多，C朗真係唔驚冇支援。

雖然個勢睇落好勁，但葡萄牙都有些少隱憂，首先就係上文提到，外圍賽強度低，會唔會令而家球隊嘅新form，喺決賽週對陣強度出現適應嘅問題。而馬天尼斯教比利時嗰陣，陣式fix死用三中堅，而嚟到葡萄牙後嘅十場外圍賽，三中堅同四後衛佢各擺五場。而葡萄牙喺歐國盃之前，都再冇正式賽事要踢，只能用友誼賽嚟試驗最終嘅陣式。
但無論點，十戰十勝嘅成績，的確打起咗葡萄牙個勢，出年嘅發揮大事可期。