勢頹車路士被紐卡素大炒 - 其實佢哋今場有試過掙扎 精選

紐卡素同車路士，一隊個勢上緊，一隊近況急跌。4-1嘅賽果，可以話預期之中，又可以話少少爆冷？
冷就冷在，紐卡素傷患甚多，又有東拿利停賽收咧，主帥艾迪賀維心中嘅最佳十一人，已經有三至四個都長期缺陣。喺球隊需要時間調整嘅情況下，面對近幾個星期打返起狀態嘅車路士，理應係硬仗一場。

點知最後，分牌上面寫住4-1嘅大比數。

車路士用咗啲比較少上陣嘅球員，特別係中堅巴迪亞舒利（Benoît Badiashile），今季聯賽未上過陣，就要喺對紐卡素嘅大戰踢正選。不過主帥普捷天奴（Mauricio Pochettino）都冇乜辦法，正選左中堅高維啱啱先傷癒，佢又需要一個識用波嘅左腳中堅，嚟破解紐卡素嘅層層壓迫。反正車仔今季本身都係練人為主，比個機會比巴迪亞舒利都無傷大雅。
但始終，呢個中後場防守組合唔係車仔今季首選，伊薩（Alexander Isak）領先嘅一球同埋哥頓（Anthony Gordon）埋齋嘅一球，都曝露出車路士禁區空間太多嘅問題。39歲嘅泰亞高施華（Thiago Silva），難以一個人填補中路空洞。
紐卡素方面，左閘用利華文圖頂上，雖然右腳唔順腳，但勝在速度夠快。而中場朗史達夫膝傷缺陣，新仔米利（Lewis Miley）再一次得到表現機會，助攻第一球開齋當然值得一讚。而佈陣上，佢唔係留喺陣型中間，而係成日到球場右側支援，加上後上嘅查比亞，同埋順勢走入中間嘅阿米朗，好快就可以形成右路人多打人少嘅局面，特別車路士今場左中堅人選較弱，紐卡素當然會重點針對。
整體陣型向右傾，組織重心喺右路三人組身上，左路伊薩同哥頓發揮速度，就可以形成速度快嘅無球走動，直接跑入禁區接直線傳球。車路士今場正選冇擺卡些度，令紐卡素嘅祖亞連頓，後上插入禁區頂就更加輕鬆。

不過，唔知係戰術理解上有誤差，定係艾迪賀迪突登咁樣擺，米利唔只係進攻時右傾，連防守企位一樣係偏向右邊，咁會偷薄咗紐卡素中場嘅厚度。意識到紐卡素過度右側呢一點，普捷天奴好快就諗通應對方法，透過加拉加牽制企位愈嚟愈靠向中間嘅利華文圖，開出右路比占士後上爆破。

大概30分鐘到中場休息，係車路士全場打得最好嘅時間，慢慢企穩陣腳。落後到1-3，車路士變陣應對，換入梅迪克、卡些度、保查，用意係以球隊嘅反擊能力為代價，加強皮球運上中場之後，喺紐卡素面前嘅控制力。
但變陣唔夠五分鐘，占士一吓拉衫引致兩黃一紅，普捷天奴諗足半場嘅變陣計劃，一下子化為泡影。落後兩球，踢少一個，得返約莫二十分鐘，車路士基本上大勢已去，冇機會翻身。