歐國盃外圍賽小結 - 戰火未完，餘波尚在 精選

2024歐國盃外圍賽貫穿成個2023年，到咗而家十一月已經結束。傳統歐洲勁旅，諸如英格蘭、西班牙、法國、葡萄牙等等都成功晉身決賽週，葡萄牙更加寫下外圍賽十戰全勝嘅紀錄，盡顯C朗老而彌堅嘅鬥志。上屆冠軍意大利，有連續兩屆入唔到世界盃嘅陰霾，喺外圍賽都遇上少少波折，幸而最後成功入圍。

同上屆賽事一樣，外圍賽分成十組，每組前2名嘅球隊奪得直接晉身決賽週嘅資格，換言之有20支球隊已經直接晉級。另外有12支未能直接晉級，但喺2022/23歐國聯球季有良好表現嘅球隊，可以出戰歐國盃附加賽，再決出3隊進入決賽週，加上主辦國德國，組成24支完整嘅參戰球隊。