【歐洲黑馬】蘭歷克大執奧地利，出年EURO大展身手 精選

奧地利喺歐洲一直算係中遊實力，甚有黑馬嘅味道，歐國盃連續兩屆入到決賽週，但世界盃就喺外圍賽被淘汰。陣中除咗最出名嘅阿拉巴（David Alaba）之外，唔少球星都具備喺德甲踢主力嘅實力。而家由德國主帥蘭歷克（Ralf Rangnick）執教，球隊風格大大改變，準備喺出年歐國盃show quali。
叱吒球壇多年，蘭歷克素有「迫搶之父」嘅名號，過去十年喺紅牛系揸旗，德國嘅RB萊比錫、奧地利嘅薩爾斯堡紅牛、甚至遠在美國嘅紐約紅牛，都係喺佢手下由頭到尾改革。作為幕後舵手嘅佢，喺2021年接任曼聯臨時主帥兼顧問之前，已經有幾年時間冇真真正正教波。而曼聯喺季後決定請坦赫入魔。未完季前，蘭歷克都接到奧地利國家隊嘅邀請，原本想同時身兼兩職，但最後都係退出曼聯，專心教國家隊。

蘭歷克上任後第一場比賽，就喺歐國聯作客0-3打贏強敵克羅地亞，叫做開咗個好頭。但之後成個賽事冇贏過，接連輸比法國、丹麥同比克羅地亞報仇，下年九月降班到B聯賽。
不過，呢一年半以嚟，球隊漸漸適應蘭歷克所要嘅風格：崇向壓迫、活力充沛，失去球權之後唔係向後重組陣型，而係設法向前迫返個波返嚟。呢一點同前任主帥科達（Franco Foda）嘅保守作風好唔同，科達強調嘅係防守紀律，同埋直接突擊。

連阿拉巴都表示，球隊有啲厭倦以往科達嘅風格。而事實上，喺科達手下，奧地利過去兩屆世界盃都入唔到圍，歐國盃都只係十六強出局，並無發揮到佢哋作為歐洲黑馬嘅潛能。

另外，奧地利人比起關心國家隊，佢哋更關心喺自己地區嘅球會。蘭歷克就係睇中呢一點，一改以往科達重視德甲球員嘅作風，比唔少機會比奧超球員，用以提升國內關注程度。喺歐國盃外圍賽八場都打滿90分鐘嘅防中施禾特（Nicolas Seiwald）、門將阿歷山大舒拿加（Alexander Schlager）等等，都係蘭歷克親自提拔，而夏季轉會窗之前都係效力於奧超嘅球員。
2022年底歐國聯降班，可以話係蘭歷克嘅試探。而貫穿成個2023年舉行嘅歐國盃外圍賽，奧地利只有一場輸比組內強敵比利時，對另一個競爭對手瑞典更加係兩連勝，以9分嘅差距拉開瑞典，成功晉級出年嘅歐國盃，比蘭歷克喺自己嘅國家一展身手。