【十戰十勝】葡萄牙拆冰島鐵桶 勝率100%進軍決賽週｜戰術分析 精選

歐國盃J組最後一輪，葡萄牙以2-0擊敗冰島。對早已確定首名晉級嘅佢哋嚟講，呢場波都係無關痛癢，比數亦一啲都唔意外。但呢場波象徵住葡萄牙以全勝嘅姿態晉身出年嘅決賽週，係今屆賽事唯一做到勝率100%嘅球隊。

尾二嗰場作客列支敦士登贏2-0，葡萄牙擺出異常進取嘅陣容，用尼維斯打中堅、菲歷斯打翼衛。今場返返主場回歸常規，防守時砌返正正常常嘅四後衛。當然進攻時一啲都唔保守，推高右閘馬里奧（João Mário Lopes），留防中保連拿（João Palhinha）喺後場組成三中堅，前面再加個內收中場嘅左閘簡些路（João Cancelo），連結返後場同中場。