唯獨你是不可取替 懷斯撐起英軍中場 精選

英格蘭上個月已經喺歐國盃外圍賽出線，最後兩場波對同組弱旅以試陣為主，最後收獲1勝1和，確定同組首名。中場主將比寧咸（Jude Bellingham）因傷退選，領隊修夫基點都要為此準備，呢兩場波比另一個中場核心迪勤懷斯（Declan Rice）同其他球員砌成唔同嘅組合，測試戰力如何。
自從2019年首次入選以嚟，懷斯就已經係修夫基陣中嘅重要成員，只有一次無關痛癢嘅賽程冇入選。人生第三次為英格蘭上陣，就係出戰歐國聯四強，打到加時先被換走，足見佢喺教練團心中嘅重要性。

佢同比寧咸組成全新世代嘅中場鐵膽組合，上年世界盃已經令人非常期待。今季比寧咸喺皇馬火力全開，有埋懷斯喺中後場嘅覆蓋保護，預計出年歐國盃會大放異彩。問題係，點樣將佢哋嘅功能發揮到最大？同埋是但一個缺陣嘅話，修夫基又應該點樣去填補？
今輪歐國盃外圍賽，修夫基點兵人腳變化唔大，但兩場「太公波」都試過唔同嘅組合。對馬爾他嘅比賽，懷斯後備上陣大約三十分鐘，算係為球隊提供到未上陣之前嘅中場穩定性，終於等到第2個入球出現。上個月對澳洲嘅友誼賽都證明一件事，就係球隊而家一旦冇懷斯，中場厚度就會大大削弱，不攻自破。而有懷斯坐鎮中場，英格蘭其他位置先可以更加無顧忌咁，專心留喺自己嘅位置發揮所長。

懷斯加盟阿仙奴之後，喺後場組織體系之中，常用左閘仙真高內收防中位，同懷斯組成中場雙軸心，為前場組織者逗住個底。而去到英格蘭，修夫基都希望有球員同懷斯一齊形成中場雙軸心，提供更大嘅穩定性。

喺2021年歐國盃，加雲菲臘斯同懷斯夾得幾好，所以就算而家菲臘斯冇乜點踢比賽，修夫基都成日征召佢入選。不過就算菲臘斯有入選，佢而家嘅狀態都不足以喺大賽打主力。軒達臣呢兩輪國際賽嘅表現，都不足以說服外界同教練團，喺出年嘅大賽同懷斯一齊夾。最後一場作客北馬其頓，修夫基排出4-2-3-1，同懷斯打雙防中嘅，係同仙真高一樣，由閘位演變而成中場嘅阿歷山大阿諾。唔同嘅係，呢兩場英格蘭嘅比賽，阿歷山大阿諾完完全全坐陣八號位，防守時唔會返返去補右閘。喺佢嘅保護之下，懷斯喺對北馬其頓嘅比賽多一個任務，就係支援基利殊、路易斯所在嘅左路攻勢。
懷斯今年加盟阿仙奴之前，喺韋斯咸已經有超過200場上陣經驗，更為球隊喺歐協登頂。而佢只需要再2次為國披甲，就達50次國家隊上陣。年僅24歲已經手執呢個CV，懷斯揹得起「新世代中場巨星」嘅名號，係睇作為主教練嘅修夫基同阿迪達，可唔可以利用佢嘅天賦同實力，為佢奪得應有嘅榮譽。