復仇成功！大勝北馬其頓5-2，意大利鬆返口氣 精選

喺主場5-2大勝北馬其頓，意大利唔單止報返2022年世界盃無法晉級嘅大仇，晉級今屆歐洲盃決賽週嘅旅程之中，總算鬆返一口氣。下場對烏克蘭只要和波，就可以直接晉級。
作客意大利，同上仗迫和意大利一樣，北馬其頓擺出三中堅陣式，今場就將防線收窄，壓縮意大利中路組織嘅空間，前線就透過巴迪、艾馬斯嘅跑動，盡量喺阿切比身後搵反擊嘅空間。

北馬其頓呢個做法，會令意大利推得愈高，受到嘅壓迫就愈大。意大利嘅應對方法，係活用閘位同翼鋒嘅連結。喺後場組織時，四後衛正常平排，而推過半場後，左閘迪馬高就會前插中路，迫使北馬其頓右中堅文尼夫上前對防，而拉開防線缺口，比中鋒拉斯柏度尼入楔，同時有基艾沙喺左路牽制，令北馬其頓右翼衛迪莫斯基成日陷入首尾不能顧嘅困境。

上場作客被迫和，加上有東拿利停賽呢個突如其來嘅變化，史巴列堤今場有啲改動，佐真奴回歸中場拍版派牌，而佢身旁嘅兩個八號位，邦拿雲杜拉同巴利拿，就會視乎佐真奴當刻而位置而幫佢補位，連結返翼鋒同閘位，試圖繞過北馬其頓比較窄嘅陣型，由邊路入到三閘線。左翼基艾沙受惠於迪馬高嘅支援，今場喺北馬緊密嘅陣型之中有唔少發揮空間，半場完結前兩個靚波，令意大利拉開到3-0嘅差距。一年半前扼殺意大利入世界杯嘅機會，今輪歐國盃又迫和過，北馬其頓縱然質素平平，對過意大利都唔係毫無機會。主帥米利夫斯基見唔對路，就安排右翼衛推前，多啲時間排出4-2-3-1陣式，前鋒巴迪收入十號位，對位壓迫佐真奴。北馬其頓半場變陣，同時食住意大利中場對抗性開始下滑嘅問題。上仗列正選嘅中場阿坦拿索夫，今場後備上陣，竟然喺下半場劣勢之下連入兩粒，一度令意大利同出局又近一步。
不過，意大利好快重整旗鼓，史巴列堤喺62分鐘變陣，加強返中場嘅控制力，同時延續上半場搵出突破口嘅做法，終於等到末兩個入波，全場5-2大勝。

雖然有過要食救心丸嘅時間，但總括全場比賽，意大利喺主場控制64%控球率，射門數以20比4壓制。球隊喺左路嘅戰術心思，令基艾沙喺62分鐘被換走前，有6次射門、2次過人成功、90%傳球成功率嘅亮眼表現。

意大利背負住連續兩屆無法晉身世界盃嘅悲痛往史，令球迷對呢支歐洲傳統勁旅信心大減。今屆歐國盃雖然有衛冕冠軍嘅身份，兩個月前首回合作客北馬竟然被迫和，加上同英格蘭嘅榜首大戰輸波，令意大利喺組內被而家排緊第三嘅烏克蘭步步進迫，對北馬其頓呢一仗要全取三分，壓力先冇咁大。