【猛扣十分】愛華頓護級難唔難？用往績話你知有幾悲觀... 精選

愛華頓嘅財政問題，由季初就開始發酵，到今個星期終於有判決結果。英超賽會宣佈，愛華頓喺2019年至2022年之間呢三個球季，錄得£124.5M嘅財政虧損，超出英超賽會所訂，任何連續三個球季虧損£105M嘅上限，違反英超「收益與可持續發展條款」，立即扣除今個球季10個聯賽積分。
愛華頓當然會提出上訴，但同時都要為最壞情況做打算。

愛華頓立足英超31年，據Transfermarkt嘅統計，佢哋從來都未試過喺英超過咗12輪都只係得4分。英超咁多季以嚟，過咗入12輪仲係得4分嘅球會，全部護唔到級。（順帶一提，而家般尼都係得4分）而英超歷史嚟到第32季，今次係第三次有球會喺季中被扣分，對上兩次都要降班收場，而愛華頓今次係扣分最多嘅一次。

睇完以上嘅小回顧，係咪覺得愛華頓今季前景好悲觀？喺確定扣分之前，愛華頓的確係打出表現，喺財政調查嘅陰霾之下，仍然留比球迷一段幻想。
愛華頓由開季三連敗英超墊底，到被罰分前以14分坐落聯賽第14位，距離降班區有多達8分嘅差距，當中領隊戴治（Sean Dyche）為球隊帶嚟嘅進步，實在相當值得令人期待呢隊波今季嘅發展。執過陣型之後，球隊呢兩個月已經確立4-4-1-1陣式嘅正選十一人，靠杜古利嘅機動力嚟打box-to-box中場，身後有防中奧拿拿同墮後核心加拿嚟保護。
左閘米高連高嘅飛躍進步，中堅班夫韋治上位後力爭上遊，呢啲都係愛華頓能夠打響氣勢嘅原因，使佢哋喺過去五場比賽豪取10分。當中最峰迴路轉嘅，係第12輪對戰水晶宮，雙方入球梅花間竹，愛華頓更加係形勢落下風，最後竟然末段入多粒，以3-2作客全取三分。
據數據網站《Opta》分析，愛華頓開季前嘅降班機會率約為34%，而機會隨球會嘅表現而一直下降，第12輪贏水晶宮後，降班機會率跌到不足掛4%。但而家扣成10分咁多，降班機會率又升返到34%左右。

睇返十年英超嘅往績，護級區大概喺33至35分左右，變相愛華頓喺剩低嘅26輪比賽，要再攞多30分左右，先至叫做有可能護級，即係場均要超過1分。

當然，上文提到愛華頓過去五場比賽取得10分，場均2分的確係唔錯嘅表現。但喺而家英超未打完半季，上半季仲有嘅七場波，已經包含曼聯、紐卡素、車路士、熱刺、曼城等等強敵，可預計會失分連連，難以應對。