【慢慢入局】紐尼斯嘅進步，你又見唔見到？ 精選 推薦

由當初同利物浦歐聯惡戰兩回合，被高普睇中後招攬加盟，嚟到英超又交唔足貨，種種質疑隨之而嚟，到而家仲係「甩甩咳咳」，仲未擺脫腳風不順嘅問題。不過，達雲紐尼斯（Darwin Núñez）喺利物浦嘅第二季，狀態同數據慢慢進步，一步一腳印回應外界質疑。
前鋒呢個位，如果冇波入就好難維持落去。猶其是而家嘅利物浦，唔算係重建當中，但球隊經歷緊舊時代同新時代交替嘅同時，又唔放棄對戰績嘅追求，紐尼斯需要透過改善終結能力，嚟保持隊內地位。將英超嘅數據除開90分鐘，紐尼斯今季平均有0.6球，而上季係不足0.5球。但助攻就大躍進，上季出場29次得3個助攻，今季到而家11場已經有4次助攻。對紐卡素後備入替嗰場，個人包辦兩球反cup全取3分，為佢加咗唔少分，亦顯示出極強大嘅心理質素。

紐尼斯定位係中鋒，但佢唔會單單喺陣容最前嘅位置等波，佢嘅傳球眼光同跑動能力，足以令佢分擔一啲褪後攞波再分波嘅工作。今季比起上季，中、短距離傳球嘅成功率都有上升差唔多10%。 今季利物浦出清法賓奴、軒達臣呢兩大防中，雖然有遠藤航加盟，但六號位主要都係由墮後核心麥亞里士打負責。所以，利物浦大部份時間喺冇正式防中嘅陣容下比賽，球隊就要壓高後防線，嚟壓縮對手嘅反擊空間，間接令令麥亞里士打身前嘅兩個中場，可以更放心喺中、前兩線之間遊走派牌。呢個佈置同時都有利紐尼斯，比佢喺更多接近禁區嘅位置出現，提高自己最後一傳同埋射門嘅數據。隊友嘅能力，當然都拓高咗少少紐尼斯一啲比較次要嘅數據。藉紐尼斯射門失手後，隊友再進行補射，今季利物浦有2個入球源於呢度，上季全季嘅次數係0。而紐尼斯出場平均每90分鐘，利物浦就有0.9次因為佢嘅射門，而造成第二次補射。如果冇積月累嘅訓練而成嘅默契，係好難捉到隊友大概施射完之後，第一時間應該走去咩位執雞，呢個團隊係有進步嘅地方之一。
今季利物浦有五個前鋒競爭三個正選位，紐尼斯、祖達、迪亞斯、加普、沙拿除咗本身打開個位之外，都有客串其他位置嘅能力。而家利物浦前線，尚算係一個良性競爭嘅狀態。到呢篇稿出街之前，今季利物浦25聯賽入波，有23個係由佢哋五個人攻入。而除咗10球4助攻嘅一哥沙拿之外，唯一交過助攻嘅，就係4球4助攻嘅紐尼斯。偏偏佢嘅正選場數係五個人裏面最少，得6場（同加普一樣）。

不過，紐尼斯仲有唔少嘢要執。兩季8個英超助攻，全部都係餵比沙拿，某程度上顯示佢要加強同其他隊友嘅配合。同時，據fbref嘅統計，今季紐尼斯嘅入球減xG值仲係負數，表示有好多應得嘅入球機會都未把握到。

總結而言，今季未夠一半，紐尼斯已經開始見到微幅進步，相信之後機會愈嚟愈多。