一場連轟四球嘅背後 車路士進攻仲有排執｜戰術分析 精選

車路士先作客4-1打贏熱刺，返到主場再嚟一場4-4嘅絕殺。兩場連入8球，睇落氣勢迫人，但球隊嘅進攻仲有唔少需要努力嘅地方。對曼城可以大比數打和，原因唔在於進攻戰術可以同曼城平起平坐，而係球隊識得因時制宜，同時燃起鬥心，最終修成正果。

今季車仔陷入重建，隊內實力同經驗兼備嘅中前場球員，要數都係得史達寧（Raheem Sterling）一個。面對曼城成熟而有條理嘅壓迫，車路士今季欠缺有經驗嘅中場指揮官，冇一個人可以有效咁提場指揮，加上高維臨陣受傷，車仔想靠慢慢由後場猜上去而贏波，喺曼城面前可以話係天方夜譚。