錯失晉級良機！巴塞作客負薩克達一球，攻力疲弱無功而還 精選

週中歐聯H組，手握9分榜首優勢嘅西甲勁旅巴塞隆拿，如果作客薩克達和波就篤定晉級。但係，喺德國嘅臨時主場，巴塞再一次交出令人失望嘅進攻表現，比賽末段奮起直追，依然徒勞無功，最終以0-1小敗，未能提早晉身歐聯十六強。

包括利雲度夫斯基（Robert Lewandowski）在內，巴塞唔少中前場球員喺十月經歷傷患，呢段時間，主帥沙維（Xavi Hernández）稍微執過吓套陣式：用阿羅祖出任右閘，將簡些路（João Cancelo）推上右翼，牌面上依然擺出4-3-3。而實際操作上，簡些路出任右路自由人嘅角色，以佢喺比賽唔同階段嘅企位，定義隊波係打緊3-5-2定還是4-3-3。