【曼市打吡】經歷歷史的分叉，曼城和曼聯此起彼落 精選 推薦

由以往紅魔鬼稱霸英倫，到而家藍月亮叱咤全歐，曼聯同曼城嘅命運，由2010年代開始走向逆轉。
雙曼之間每年至少見面兩次，全市狂歡，加上曼市作為足球聖地。同城打吡嚟講，如今全球最矚目嘅，莫過於曼徹斯特打吡。

英格蘭足球悠悠青史，比起利市打吡、東北打吡、北倫敦打吡等等，曼徹斯特打吡唔算歷史最悠久。2000年代曼聯稱霸英格蘭，當時曼城仲係英超新丁，幾季浮沉喺英超中下遊。至到中東油王注資，買入甘賓尼、薩巴列達、阿古路、大衛施華等等第一代藍月功臣，先至慢慢建立起而家嘅土豪隊。加上迪布尼、艾達臣、貝拿度施華等人後繼有功，令哥迪奧拿有延續強勢嘅基礎。相比起嚟，費格遜執掌紅魔鬼26載，球隊聲名卓著，更成功建立全球品牌，吸引全球無數球迷。但費sir退休後，球隊難以重現以往嘅風光，摩連奴、蘇斯克查等等幾次中興嘗試曾經帶嚟希望，但最後都以失敗告終。
2016年哥迪奧拿登陸英超，將傳控哲學深植曼城血脈，影響兩代主將嘅比賽基礎。幾次英超奪冠成功之後，上季終於跨過歐聯冠軍呢個難關，無疑係2023年最強足球隊。

而同時，日落西山嘅曼聯，上季改由阿積士領隊坦赫執掌，徹徹底底改變陣式之餘，亦慢慢去除球會過去嘅一啲深層弊命，一季時間就捧盃兼重返歐聯。
對呢類同市打吡嚟講，各自自家青訓嘅表現，都係球迷情感投射所在之處。曼城嘅霍頓、曼聯嘅拉舒褔特，都係曼徹斯特本地弟子，年輕時已經喺各自球會學師，成長成而家嘅主力。紅藍兩隊嘅球迷，可謂係由細睇到佢哋大。打吡戰雙方對碰，同時係展示本地球星喺邊個青訓營優勝劣敗嘅時候。

夏蘭特登陸曼城，更加係兩代球迷算清新仇舊恨嘅時機。夏蘭特係挪威人，但佢係喺英格蘭出世，當時佢老豆艾菲夏蘭特仲踢緊列斯聯。轉會曼城後，第一次曼市打吡就被堅尼剷到差啲斷腳收山。

但夏蘭特近幾季嘅發展，已經奠定咗當代最強中鋒嘅名號。對曼城球迷嚟講，夏蘭特能夠喺曼市打吡取得佳績，就係對曼聯廿幾年前收山一腳最好嘅報復。

足球嘅競爭，豈止場上技術交鋒，更加係背後營運嘅比較，同埋彼此基於歷史嘅發泄。同市之間嘅比拚，更添一重情感嘅意味。曼市打吡，萬勿錯過。