【星級教練團】朗尼執教伯明翰 攜A高爾＋奧沙誓闖英超 精選

英格蘭傳奇前鋒朗尼，退役後即刻開展領隊生涯，幾年落嚟都冇辦法帶領所屬球隊創下佳績，但都能以逆境求生嘅帶隊方式，建立自己生涯初期嘅聲望。今個月，英冠中遊嘅伯明翰任命朗尼為新任主帥，連同幾個球員時代甚具聲望嘅教練團成員，誓要衝上英超聯。
幾年前執教打吡郡嘅時候，有段時間朗尼就因為戰績低落而不斷換陣式，導致球員有啲唔適應。而2021-22球季打吡郡因為財政問題而招致轉會禁令，令朗尼不得不從青年軍入手，配合陣中老將嘅領導，勉強完成佢退役後，第一個完完全全以領隊身份執教嘅球季。

朗尼雖然唔能夠令打吡郡護級，但實屬非戰之罪。當季球會因財政問題而引致違例，要直接扣除21個積分，同時有具經驗嘅球員季中離隊。朗尼喺呢個絕境下，帶頭令手下球員激發求生本能，唔少打吡郡嘅年輕球員得到表現機會。打吡郡最後排英冠第23名，尾二降班，但如果加埋扣咗嘅嗰21分，打吡郡係可以排上第17名，同降班區拉開18個積分嘅差距。
呢段短暫嘅打吡郡之旅，令朗尼得到不一樣嘅讚譽。季後重返DC聯執教，2022年東岸墊底之後，2023年大有進步，但都係以3分之差失落季後賽資格。完約後，藉伯明翰換帥，朗尼重返英格蘭，開始第二次喺英冠教波嘅生涯。
朗尼今次返到英格蘭，手下嘅下屬不乏昔日名將。對香港球迷嚟講，比較熟悉嘅可能係車路士名將艾殊利高爾（Ashley Cole），以及朗尼嘅曼聯舊隊友奧沙（John O’Shea）。A高爾喺車路士功勳卓著，2019年退役前，生涯最後一站係老友林伯特所帶領嘅打吡郡（當時朗尼仲未去打吡郡），退役後留隊加入教練團，之後跟埋林伯去車仔做青年軍教練。兜兜轉轉，前一季季跟返林伯特教愛華頓，今年年初離隊後，而家就被朗尼招攬。
至於奧沙，佢2019年喺雷丁掛靴後留喺一隊教練團裏面，同A高爾一樣入過各自國家隊U-21嘅教練團，甚至奧沙做過愛爾蘭成年國腳嘅教練團成員。另外，前威爾斯國腳卡爾羅賓遜（Carl Robinson），今年同朗尼一齊由DC聯轉投伯明翰。連同前任教頭留低門將教練泰萊（Maik Taylor），都曾經係北愛爾蘭鐵膽國腳，而家輔助朗尼。

朗尼手下的教練團成員，年輕時都係英倫三島各自國家隊嘅主力，退役後喺英冠、乃至國家隊U隊都曾經擔任教職，具備贏波嘅經驗之餘，都識得馴服陣中小將，加以培植，能夠符合朗尼之前喺打吡郡執教之時，以年輕球員為球隊中心嘅理念。