17歲基奧一球奪三分 巴塞再一次由青訓營撐過傷患潮 精選

四年前，安素法迪一舉成名，趁美斯同蘇亞雷斯受傷之時，撐住巴塞隆拿嘅前線。時移世易，巴塞而家中前場傷患連連，造就17歲嘅小將馬克基奧（Marc Guiu），處子出場唔夠半分鐘，就攻入人生第一個西甲入波。
巴塞而家陷入傷患潮之中，唔止主力射手利雲度夫斯基，連同拉芬拿、迪莊、柏迪、羅拔圖等等球員都入咗十字軍。小將費文盧比斯再次上陣，臨時同祖奧菲歷斯、費蘭托利斯砌出三箭頭。前線缺少咗利雲度夫斯基（Robert Lewandowski）呢把尖刀，就算菲歷斯、托利斯合作嘅前線能夠打出流動性，去到埋門一腳始終都係踭咁啲。 下半場開波35分鐘，巴塞掌握65%控球權，射門6射3中，硬係過唔到畢爾包門將史蒙（Unai Simón）一關。

傷患潮之下，菲歷斯（João Félix）已經係巴塞最好嘅鋒將，今場波繼續發揮輔鋒本色，能傳擅射盡力攻擊。58分鐘，根度簡（ílkay Gündoğan）帶球上前，菲歷斯禁區頂轉身一抽被撲到，畢爾包後防掛住舉手冇褪後，費文盧比斯、根度簡先後上前補射竟然都入唔到波，足見巴塞入球能力有待改善。
不過，如果呢球補射入咗，我哋就未必見到基奧嘅出場。巴塞60分鐘變陣，換走防中羅美奧，加入復出嘅耶馬爾加強攻力，但呢段時間進攻依然死火。

基奧喺80分鐘上場，企喺陣型頂端，「喉」住菲歷斯接波轉身嘅一刻馬上起跑。mark住佢嘅後衛韋維恩已經跑足全場，對比起嚟，啱啱先出場嘅基奧身體狀態十足，速度上壓過轉身唔切嘅韋維恩，奔到禁區左邊，左腳一控調整好射姿，右腳馬上一抽。門將史蒙出迎一刻已經封好位，左手拍到基奧射波，但都係照入網。
比賽最後階段，畢爾包奮力頑抗，保住後場嘅控制力。但係球隊始終無法再前進一步，落後1球之下空有球權，造唔出有威脅嘅攻勢。當然，達史特根一夫當關，都係呢場波嘅勝因所在。但係基奧處子出場23秒致勝，風頭更盛。

尚記得2019年嘅安素法迪（Ansu Fati），喺巴塞一眾前鋒大佬傷哂嘅時候挺身而出，未滿17歲就要擔大旗，喺人生第一次西甲正選上陣就攻入處子入球，之後更加接過美斯嘅10號波衫，雖然不被沙維重用要外借，但都帶比巴塞球迷唔少希望。而家輪到另一個青年軍喺一隊掘起，藉巴塞一眾球星受傷而成為焦點。

不過，巴塞嘅傷患潮係持續多時嘅，又點會因為基奧嘅一個入球而解決到？週中歐聯過後，就係對皇家馬德里嘅國家打吡大戰，小將們壓力肯定更大，只求努力應戰。但基奧呢一球，對而家陷於傷患潮嘅巴塞嚟講，至少能夠提振士氣。