曼城小勝白禮頓：勝在善用「孤立」二字 精選

曼城週末以2-1擊敗白禮頓，呢場波表面小勝一場，但戰術調度嘅大膽值得關注。單兵表現方面，除咗夏蘭特終結兩場波嘅「入球荒」之外，仲有翼鋒杜古（Jérémy Doku）上半場輾壓對手嘅精采表現。

孤立，係曼城呢場波開局時嘅主軸。防守上，曼城要孤立白禮頓中後場持者同隊友之間嘅連結。進攻時，曼城透過中路球員嘅錯位，製造杜古喺左翼一對一嘅機會，決心要用呢位法甲過人王嘅爆發能力，嚟專門針對已經37歲嘅占士米拿。