【RIP Sir Bobby】 幾任曼聯隊長向卜比sir致敬：場內場外英雄，啟迪後世紅魔 精選

卜比查爾頓爵士（Sir Bobby Charlton）逝世，終年86歲。佢為英格蘭足球留低嘅傳說，足以被幾代人紀念。而作為曼聯名宿，唔少後來嘅曼聯球星，都視呢位前輩為可敬嘅偶像。

「我有幸為曼聯踢波，原因就係卜比sir。」遠在美國嘅碧咸（David Beckham），喺IG出文向卜比sir致敬，指佢係一個國家英雄：「我個姓名來自於佢，一個我崇拜嘅人，一個唔止為曼聯，仲為英格蘭取得1966年世界盃冠軍嘅英雄，我會永遠感激佢。」碧咸全名David Robert Joseph Beckham，中間嘅Robert，正係以卜比sir呢個佢爸爸最愛嘅球員而命名。
卜比sir喺英國時間朝早逝世，下午消息公佈。英冠方面，有卡域克（Michael Carrick）領軍嘅米杜士堡，主場迎戰朗尼（Wayne Rooney）帶領嘅伯明翰，兩個都係近代嘅曼聯隊長。而球賽進行到一半期間，米杜士堡主場螢幕亮起咗卜比sir嘅相片，全場致敬。
「我仲係好震驚，下半場一開波就見到佢張相喺大銀幕出現，唔知發生咩事。」朗尼喺英格蘭同曼聯都打破過卜比sir嘅入球記錄，佢話卜比sir唔止係個傳奇人物，做人更加係一流，啟發咗好多曼聯球員，自己係其中之一。

而卡域克下半場由更衣室出嚟見到嘅畫面，令佢感到好奇怪：「嗰陣個感覺好難形容，我見到朗尼喺我隔離，我同佢對望。嗰陣我成個腦都回憶緊我同卜比sir嘅回憶，眼前場波已經唔關事。」卡域克話，永遠唔會忘記2008年卜比sir親身去訓練場，與球員分享當年今日。而嗰日，正正係慕尼黑空難五十週年紀念。
而當晚，亦係曼聯作客錫菲聯嘅比賽，曼聯隊長般奴費南迪斯喺中圈獻花。球隊被錫菲聯追平後，末段成功再度領先，完場贏2-1，總算冇喺呢個悲傷嘅日子，為曼聯球迷再添悲痛。主帥坦赫形容，查爾頓係曼聯球員嘅榜樣。

以身作則，卜比Sir令人尊敬。加利尼維利（Gary Neville）形容，佢係英格蘭足球最好嘅代言人，場內場外都係贏家。唔止用球場上嘅成就嚟為自己建立功名，佢對後世無窮啟發，先係為一支球會所留低最重要嘅資產。以身作則，捲土重來，呢啲統統都係曼聯球員敬仰卜比sir嘅地方。