失正選龍門大位 藍斯度：我同拉也關係好好，互相扶持

要選今季英超最失意嘅球員，阿仙奴門將藍斯度（Aaron Ramsdale）肯定榜上有名。作為上年衝擊英超冠軍之旅嘅重要功臣，藍斯度嘅正選位置，被傳球能力更好嘅西班牙門將拉也（David Raya）取代。佢近日接受訪問都話自己度過緊生涯最難過嘅時刻，但同拉也係屬於互相扶持嘅關係。
「我第一次遇上呢種情況，唔容易應對。」現年25歲嘅藍斯度，2017年轉會至般尼茅夫，先後外借到英乙、英甲兩季後，2019年先喺英超亮相。雖然佢把關之下，所效力嘅球會連續兩年都無奈降班，但藍斯度嘅進步非凡，球會降班實在唔係佢嘅責任。2021年由錫菲聯加盟阿仙奴後，更將經驗豐富嘅蘭奴（Bernd Leno）趕到後備席，成為球會上季爭逐英超冠軍嘅後防主力。

不過，阿仙奴季後決定由賓褔特租借門將拉也，租借費£3M，並附有£27M嘅買斷條款，下季有可能繼續披上阿仙奴戰衣，喺呢支北倫敦球會繼續出戰。咁表示藍斯度嘅正選席位，未來唔會再好似上季咁穩固。

「每日都一齊練波三四個鐘頭，成個團隊有四五個人一齊。」縱使對方直接令自己冇波踢，但藍斯度幾尊重呢段競爭嘅關係：「作為專業嘅門將，我哋相處得好好，互相督促，有時我好down，佢都會勉勵我。」
「而可能有一日，輪到佢因為一啲原因而變得down，咁我就要扶返佢起身，儘管到時我可能因為上陣問題而感到沮喪。」
成個2022/23球季，藍斯度同拉也一樣踢足38場，藍斯度有14場保持清白之身，合計失43球，拉也就係12場比賽不失球，合計失46球。表面數據嚟睇，兩位門將相去不遠，但計埋撲救率，拉也喺賓褔特面對比阿仙奴更多嘅射正數，作出嘅撲救率高達77.7%，數據排英超門將嘅前2%。而藍斯度面對較少嘅射正數，撲救率反而更低（70%），只排上季英超門將嘅前41%。
阿迪達將陣型推前，門將嘅出擊能力就需要參考。拉也對於出迎比較有自信，藍斯度雖然都唔會一直沉底等撲救，但出迎腳步稍有猶豫，分分鐘會令自己失去最好封位嘅時機，呢方面拉也顯得決斷得多。

另外，傳球能力係兩個人之間嘅最大分野。據Fbref.com嘅數據，喺30碼以內嘅傳球，藍斯度同拉也嘅成功率相差唔多，但超過30碼嘅長傳，藍斯度就只得35.8%，拉也係44.7%，明顯比較高。而面對斬波威脅，拉也嘅出擊都比較主動，能夠喺對方射手喺禁區內掂到波之前，就解除8.7%嘅斬波威脅，喺上季嘅英超門將裏面算係名列前茅。相反，藍斯度只成功解除5.8%嘅斬波威脅，小小幾個百份點嘅差距，已經令佢喺呢個項目排喺英超中後段。

為此，面對撲救能力稍勝，而傳球能力大勝嘅拉也，藍斯度被貶後備實屬無奈，只求喺更激烈嘅競爭之中力爭上游，終有一日重拾正選席位。