鄧克獲選為英格蘭單場最佳 - 31歲白禮頓隊長，生涯僅第3次為國上陣 精選

今輪國際友誼賽，英格蘭喺溫布萊主場輕描淡寫，1-0擊敗遠道而來嘅澳洲。而生涯僅僅第3次為國披甲嘅中堅路易斯鄧克（Lewis Dunk），就獲選為呢場波嘅最佳球員。

或者好多人覺得友誼賽「講嚟都嘥氣」，主場僅小勝澳洲一球更加係贏少咗。但對呢啲邊緣國腳嚟講，能夠喺全國最大嘅球員為國家隊上陣，更取得全場最佳球員嘅殊榮，絕對係難能可貴嘅風光時刻。
鄧克由青年軍時代就效力白禮頓至今，見證球隊由英甲到英冠，再英冠升班，到今日穩守英超中遊嘅地位。由基斯曉頓執教時嘅低位防守，到樸達開始打進攻足球，乃至而家迪沙比對掌控球權嘅堅持，鄧克呢位高大中堅一直努力適應時代嘅變化，一直維持自己喺球會嘅主力地位。

不過，鄧克嘅時代，同時係英格蘭中堅人才輩出嘅時代。修夫基執掌以嚟，兩屆大賽都用史東斯、麥佳亞呢對組合。喺佢哋兩個之外，同鄧克同輩嘅泰朗明斯、米高堅尼，乃至更年輕嘅馬克基爾、賓葛菲、杜莫利等等，都各有光芒四射嘅時劇，風格各擅勝長。競爭之下，令鄧克被排除喺國家隊之外多時。到今日31歲先至為國家隊第3次上陣，而3次都係無關痛癢嘅友誼賽。近年修夫基屢屢被外界批評為戰術保守，但用人方面佢一直都好放膽，特別係友誼賽同歐國聯，佢會稍稍放棄比大賽主力上陣磨合嘅機會，換嚟比啲二線球星為國披甲嘅機會。修夫基今場波收起獲加、簡尼、比寧咸、懷斯等等嘅大賽主力，令高維爾、保雲、莊士東等等較少披上三獅戰袍嘅球員有表現機會。表現光芒四射嘅鄧克，正係其中之一。
早喺五月嘅國際賽期，鄧克相隔五年再度入大軍，只係當時兩場波連後備都冇，到上個月北上作客蘇格蘭贏3-1有份上陣，今日返到倫敦再有出賽機會。「佢護空門嗰吓好關鍵，喺禁區亦表現非常勇悍。」主帥修夫基形容鄧克捨身飛擋，阻擋澳洲唔少關鍵嘅射門之餘，用波表現亦相當沉穩。「同上次入選相比，佢喺樸達同迪沙比麾下進步咗好多。」

當然，以鄧克嘅年紀同能力，要為英格蘭建功立業，難度的確唔細。但考慮到麥佳亞呢兩季喺球會上陣時間銳減，以及史東斯喺定位上嘅轉變，以及卡爾獲加嘅老化，修夫基嘅後衛組合，預計會有唔少嘅轉變，以保持球隊後場組織嘅流暢度，同時又唔會犧牲防守穩定性。要換走佢已經打過兩屆大賽嘅主力，需要時間比新嘅主力練習默契，呢啲友誼賽同歐國聯比賽，係好好嘅練習舞台。
有會沉退後防線嘅懷斯加強後場組織，喺史東斯身邊嘅中堅拍檔，修夫基應以防守穩定性為第一考量。鄧克禁區表現穩健，經驗豐富，更附帶用球能力，理應係修夫基嘅選擇之一。