一球小勝，掩蓋不了沙卡缺陣的影響｜阿仙奴1-0曼城｜戰術分析 精選

曼城作客叩關，阿仙奴1-0小勝。雖然如此，但阿仙奴嘅進攻端嘅表現都稱不上好，主因係左翼馬天尼利（Gabriel Martinelli）傷癒之際，又有右翼沙卡（Bukayo Saka）新傷缺陣，左右兩翼都唔喺正選十一人，令主帥阿迪達要臨時諗計，全場（尤其是馬天尼利入替前）進攻表現難談上佳。
今場波，兩邊嘅進攻端嘅缺陷有相似嘅地方：用技術型中鋒嚟客串右翼嘅同時，全場佈置都令雙方真正嘅九號中鋒得唔到有效嘅支援。唔同嘅細節在於，曼城以卡爾獲加帶動右路，同客串右中場嘅右閘路易斯、以及客串右翼嘅艾華利斯，三人互相為隊友牽引空間，但連結唔到中鋒夏蘭特。阿仙奴方面，反而係兩個中路球員（捷西斯、賓韋治）客串右路兩個位置，令右路顯得笨拙低效，同樣連結唔到中鋒尼基迪亞。

除咗馬天尼利折射入球之外，阿仙奴喺三閘線後嘅表現的確乏善可陳。上半場托沙（Leandro Trossard）喺左路嘅妙傳，搏到迪亞斯一個小失誤，造成尼基迪亞（Nketiah）直入禁區，但佢處理得奇差無比。
馬天尼利半場上陣，效果立桿見影，喺75分鐘阿迪達再一次變陣之前，三十分鐘內重現佢同仙真高喺左路合作無間嘅配合，最後親手了結比賽。
馬天尼利同沙卡，係阿迪達幾季以嚟嘅鋒線重建核心。由上兩季開始，阿仙奴喺聯賽，至少會有其中一人列陣正選。到今季，馬天尼利自九月開始養傷，已經五場比賽冇出場，今日趕及復出先列後備。好死唔死，週中歐聯比賽對朗斯，沙卡一次腳後踭傳球後肌肉不適而傷退，之後確定腿筋受傷，對曼城呢場大戰更顯撲朔迷離。
為此，阿迪達將捷西斯（Gabriel Jesus）移去右路，期望佢嘅創造力同牽動防線嘅能力，能夠為後備中鋒尼基迪亞帶嚟好運。而馬天尼利喺左路嘅空缺，繼續由影子前鋒托沙頂上。當托沙要喺三閘線前造波之時，就喺卡爾獲加嘅嚴密看管下無計可施。但佢後撤支援中場時，奧迪加特就更有條件推前半格，收縮同捷西斯、尼基迪亞之間嘅距離。

因應沙卡嘅缺陣，平時習慣內收至三中堅嘅賓韋治（Ben White），呢場比賽喺右路不斷Overlap上去，做個真真正正嘅二號右閘。但右閘呢個位置，對中堅出身嘅賓韋治嚟講，本身已經係客串緊，對客串右翼嘅捷西斯嚟講，就係得唔到沙卡咁高效嘅支援，令佢嘅攻擊力大打折扣。
作為右腳球員，捷西斯係右路嘅持球內切，效果已經冇左腳仔沙卡咁好。而加華迪奧、艾基等等左腳守將，仿如形成一度又一度屏障，令捷西斯更難以爆入深處再製造攻勢。

由此可見，沙卡一人嘅缺陣，對阿仙奴嘅佈陣，影響幾咁深遠。好彩國際賽期在即，令沙卡有時間養傷之餘，都比阿迪達有時間探索更多變陣空間，補上沙卡嘅右路空缺。