北倫敦打吡 - 從細節看中場激戰｜戰術分析

今週北倫敦打吡以2-2告終，失誤、運氣等等因素造就多個入球嘅誕生，但呢場波刺激嘅位在於，面對阿仙奴雄心壯志嘅壓迫，普斯迪高古要熱刺交出更強大嘅決心去保護球權，令球迷享受一場中場大戰嘅盛宴。
熱刺正選陣式冇乜變動，相反阿仙奴因應馬天尼利受傷，左翼打邊嘅任務由捷西斯負責，中鋒由尼基迪亞頂上。而面對熱刺開季默契良好嘅中場壓迫體系，阿迪達以法比奧韋拉代替夏維斯打中場，加強對球權嘅控制。而熱刺控球時：時常沉退嘅防中比素馬、時常支援右路嘅中場沙亞，同中堅羅美路、右閘樸羅形成四人控傳組合，係熱刺面對阿仙奴中場壓迫，最能夠解壓嘅一條路。

阿仙奴有奧迪加特、法比奧韋拉向前迫，懷斯就會跟上覆蓋雙中場身後嘅位置，避免樸羅、沙亞有向前爆發嘅機會，用意係將皮球保持喺熱刺嘅後場，隨時截到波之後馬上打快攻。

有見及此，熱刺另一名中場麥迪臣，相對就要再向後退一格，貼近熱刺嘅中後場陣型，而疏遠少少前線，此舉令熱刺能夠保持喺中後場對皮球嘅控制，但就難以大腳突擊拉開局勢。
阿仙奴陣型推前，目的係搏得快速突擊嘅機會。同樣地，麥迪臣喺阿仙奴後場亦係伺機而動，截得佐真奴嘅控球權直搗黃龍，交予孫興慜追平比數，用阿仙奴最希望打得成嘅攻勢，嚟追平阿仙奴僅得一分鐘嘅優勢。
佐真奴嘅失誤應記一大過，但阿迪達半場換走懷斯而換入佐真奴，有佢嘅道理所在。一嚟係懷斯受傷之下六號位無人可用，二嚟佢要換夏維斯入中場加強威脅之餘，又要保持球隊喺中場嘅控制力。橫觀整個下半場，雙方嘅控球其實更趨平均，阿仙奴下半場控制返少少形勢 有做到收復失地嘅效果，只係入唔到波咁解。
另外，熱刺嘅比素馬要「喉住」奧迪加特，加上夏維斯入場後會喺中、前場之間遊弋，令熱刺中場喺下半場面對嘅壓力，比起上半場增加不少。而沙亞就要幫多啲比素馬補位，令阿仙奴中場控得更加舒服。

但隨時間嘅推移，熱刺嘅壓迫鍥而不捨，阿仙奴嘅三中堅控球體系就愈見崩潰。唔單只係加比爾喺中路同左路之間進退失據嘅問題，因應夏維斯要向前捕位，中場同左路之間嘅空洞，要靠仙真高不斷加重workload去補位負責。

開季至今聯賽不敗嘅表現尚算有驚喜，特別係孫興慜移任中路後依然交得出進攻表現，但歸根究底，熱刺今季要面對簡尼離開嘅陣痛期，欠缺世界級箭頭喺關鍵時候英雄式全取三分，係今季要面對嘅問題。今場下半場久久未能再下一城，正是一例。