阿仙奴「雙泰」外借 正宗左閘今季清空

先借出泰亞尼，再清走泰華利斯，將兩個正宗左閘完全清出，阿仙奴今季左閘內收嘅戰術體系可以話係博到盡，左閘位置喺進攻時會100%完全內收中路，難有壓上進攻嘅選項。
泰亞尼（Kieran Tierney）自2019年加盟阿仙奴，幾個月後就係阿迪達時代嘅開始，四季以嚟踢吓又傷吓，潛力仲未完全兌現，今季決定外借西甲皇家蘇斯達，以獲取更穩定嘅上陣時間。以佢目前仲有3年嘅合約嚟睇，阿迪達目前唔諗住就此放棄佢，但今季冇佢嘅上陣時間，唯有外借練兵保持狀態，他日以更強大嘅姿態回流兵工廠。

但同時，而轉會窗完結之前， 《標準晚報》報導阿仙奴同意釋出紐奴泰華利斯（Nuno Tavares），以£2M借去同為英超球隊嘅諾定咸森林，並附有£12M嘅買斷條款。泰華利斯上季借去馬賽，同高拿仙納一齊上陣打左路突擊，有相當唔錯嘅發揮，但攻強守弱嘅佢，返到阿仙奴就似乎未達阿迪達嘅標準，先借後賣的背後，就係要儘早出清。
上季勇闖英超冠軍嘅歷程之中，仙真高有大半季打正選左閘，令球隊組織時內收入中路嘅體系已經成型，泰亞尼就唔會係Plan A。不過，同時借走泰亞尼同泰華利斯，如果轉會deadline前冇收購的話，代表今季阿仙奴嘅大軍之中唔會有正宗左閘，阿迪達將成績完全押注喺左閘入收嘅戰術。

由季前熱身賽到開季，阿迪達喺呢個位置上嘅首選係新兵添巴，但添巴遭受前十字韌帶傷患，開刀後隨時會提早收咧。喺仙真高未有狀態之前，冨安健洋、基維奧，甚至開季突然冇正選踢嘅加比爾，都能夠勝任喺左邊half-space逗住後場嘅呢個角色。
所以，清出隊內兩個僅存嘅正宗左閘，球隊都唔怕三號位冇人用，好處係令隊友喺所有時間都能夠保持陣型習慣。不過，缺點係喺陣型被看破之時少一個變招，阿迪達就冇一個速度上乘、突擊力強、同時具備左腳出波能力嘅左閘去做Plan B，一人打通左路，同內收half-space嘅馬天尼利做配合。

有夏維斯、懷斯等等嘅重點收購，加上上季加盟嘅托沙、基維奧、法比奧韋拉等人漸漸上力，阿仙奴今季嘅板凳深度加強咗唔少，喺而家嘅體系之下，幾乎每個位置都有可靠嘅副選，喺今季四線作戰之下繼續衝擊英超冠軍。但正宗左閘嘅位置，今季就真係完全冇人擔任。