加盟盧頓再踏英超征途 巴克利的重生之旅

由愛華頓嘅鐵膽主力，到車路士嘅板凳浪人，等待生涯救贖嘅前三獅國腳巴克利（Ross Barkley）上季效力法甲尼斯，一整季證明自己嘅狀態已經死灰復燃，今季加盟英超升班馬盧頓，本週末完成處子戰，救贖之旅正式開始。
英超時代首次升上國內頂級聯賽，盧頓主場未搞掂就開季，重返英超先被白禮頓炒1-4，仍有主力前鋒摩利斯十二碼開齋，攻入隊史英超第一球。到第二場波巴克利正選披掛，面對前東家車路士又輸0-3。 呢一場比賽，巴克利取代咗安賓素，同拿甘巴、陳達毅組成中場三角，圍繞住佢哋嘅，就係盧頓嘅三中堅、兩翼衛同雙箭頭。

喺英冠下半季有拿甘巴（Marvelous Nakamba）加盟穩佔防中一席位，今季預料會繼續係盧頓六號位鐵膽，有佢嘅保護下，巴克利鬥志旺盛，惟銳利不足，上半場主要喺左邊halfspace活動，同陳達毅分別負責中路至兩邊嘅串連，但巴克利向前傳球並唔多。盧頓兩場波控球率都係三成左右，射門數字都被同為中上遊嘅對手輾壓。
上季摩利斯（Carlton Morris）攻入20球，係英冠射手榜排第三，但比起入球數字，更重要嘅係佢同艾迪巴約（Elijah Adebayo）呢對雙箭頭嘅多功能特性，喺盧頓控球在腳嘅時候扮演相當重要嘅角色。無論留喺中路做target-man推進攻勢，定係去到half-space支援翼衛拉闊陣式，都有賴佢兩個嘅球場判讀。用球能力有一定水準嘅比爾、布基擔任兩邊中堅，有時會直接大腳傳比雙箭頭快放，令盧頓能夠打得更直接。
無論防守質素定同後衛嘅碰撞強度，英超同英冠都天差地遠，當然唔會期望摩利斯可以延續上季嘅入球效率。能夠喺英超保持球隊喺英冠賴以成功嘅體系，令身後每個球員都踢得舒服，先係雙箭頭今季嘅首要任務。

而巴克利嘅加盟，就係為咗令呢個目標實行得更加順暢。喺雙箭頭做高空支點時負責爭搶皮球落點、邊路突擊時幫手加多個人喺中路、halfspace吸引防線，乃至喺球場前線擔任後上中場爭取入球，喺盧頓控球時間唔多嘅情況下把握入球機會，呢啲都係巴克利能夠為盧頓帶嚟嘅貢獻。

盧頓嘅奮鬥故事令人熱血沸騰，但要喺臥虎藏龍嘅英超生存到尾一啲都唔易，特別係身為平民球隊嘅佢哋本身經費不足，甚至球隊主場要改建先符合到英超嘅要求，更難期望有球星加盟。喺盧頓已經建立已久嘅體系之中，帶嚟一位英超經驗豐富嘅中場核心，巴克利同盧頓兩者結合相得益彰，無論能夠走到幾遠，都不失為一個好嘅合作嘗試。