拒借紐卡素17歲新人外出吸經！？賀維：呢個年紀應該要留喺母隊，因為。。。

紐卡素買入六千萬中場新援東拿利，新球季自然會被寄予厚望，但對領隊艾迪賀維嚟講，發展隊內潛力新星，係同樣重要嘅目標。講緊嘅係自家培養嘅中場小將，年僅17歲嘅路易斯米利（Lewis Miley）。

得到中東資金入主，紐卡素重拾普日豪門本色，今季更加打入歐聯分組賽，球季發展備受矚目。而佢哋呢兩季嘅轉會操作，唔似係要大手引入球星嘅土豪式揮霍，而係就住教練團嘅需要而適度引援，每一筆大手交易都做得理性。

米利自7歲加盟紐卡素，會方對佢十年裁培毫不枉費，上年奪得隊內象徵最有潛質成材嘅「Jack Hixon Award」，更已經受英格蘭U17國家隊徵召，躋身幼獅行列。「佢下季會同我哋一齊踢，完全冇諗過要將佢借出去。」 賀維話，由今年年頭開始就持續觀察呢位年輕球員喺一隊嘅成長，上季英超煞科戰，米利對車路士最後14分鐘出場，成為紐卡素喺英超歷史上最年輕上陣嘅球員。啱啱完咗之後車路士嘅友誼賽，賀維安排東拿利、米利拍住踢足全場唔休息，足見今季佢有機會同東拿利拍住上。「對我嚟講，佢而呢個年紀承受太多注意力，仲係太早。佢要留喺屋企人身邊，同我哋一齊訓練，跟住我哋現有嘅球員去成長。」
或者賀維嘅意思，係要避免揠苗助長而適得其反。唔好講英超，就算係英冠，喺英格蘭國內都有唔少嘅曝光。喺其他規模較細嘅球隊做主力，同樣要承受因失誤而嚟嘅輿論壓力，年紀太輕嘅球員要喺呢方面受到保護。留喺成長嘅地方，跟住一班師兄學法，同時有家人相伴，等佢心理、球商更成熟先至準備借去外隊做主力，成長路途會走得更順。
17歲嘅米利有185cm嘅身高，亦非完全瘦削嘅竹竿型身材，先天身型優勢令佢喺護波、搶身位等方面能夠更快有進步。如果好似賀維話齋，今季有更多上陣時間的話，相信米利會作為甘馬雷斯嘅後備選擇，為六號位注入唔同嘅踢法，甚至需要中場更強搶截能力嘅時候，將祖亞連頓推上翼鋒位置客串，東拿利、甘馬雷斯覆蓋中場兩側，比米利喺身後做最後一層嘅保護。

「對年輕球員嚟講，體能係最大嘅挑戰。但你睇佢今日嘅表現，體能十足，體格強壯，好快就入到局。下一步我哋要比佢多啲推動力去成長，都幾肯定佢今季會有上陣時間。」賀維甚至講到，佢教過嘅球員當中，米利呢個年紀嚟講，冇幾個比佢更好。