格列沙卡轉投利華古遜：阿朗素要我踢六號位！ 精選

瑞士中場格列沙卡離開阿仙奴，以£21.5M轉投利華古遜，成為名宿沙比阿朗素麾下主將，相隔七個球季重返德甲踢波。

曾任阿仙奴隊長嘅沙卡，2019年因為同球迷起槓而失去隊長地位，事件發生後冇耐阿迪達來投。呢幾年間，沙卡甚至一度傳出要去意甲加盟羅馬，但最後冇成事，決心留隊後慢慢重拾地位，上季更加係球隊爭冠主力，到今季先至走人。

「上季我踢八號位比較多，效果亦唔錯，但嚟到呢度就唔同。」 轉會前後嘅兩個領軍人物，兩位西班牙少帥都係年少有為。利華古遜目前夏季喺奧地利集訓，沙卡接受《The Athletic》訪問，指阿朗素同阿迪達，兩個人有好多諗法都好相近：「我鐘意呢度嘅強度，每課操練都出盡全力，德國式嘅強悍心態，係我哋嚟緊今季要有嘅風格。」利華古遜上季季初出閘脫腳，開季就跌入降班，管理層十月決定由阿朗素接手球隊，好快就執返正隊波，二月至五月打出不敗走勢，成功谷底反彈。雖然季尾狀態回落，德甲五場不勝收季兼歐霸四強出局，但球隊最後都緊守德甲第六位，「掹車邊」攞返來季歐霸席位。
呢個過程，有賴阿朗素為球隊注入新嘅能量同踢法。佢嘅領導之下，利華古遜以3-4-3作為主戰陣式，防守嘅時候翼衛後撤形成5-2-3，但前場三子甚少向邊路補位，反而會向內收入中路做第一道屏障，向對手嘅中場組織施以極大嘅壓力，從而迫對手向兩邊推攻攻勢，面對利華古遜早已完成佈陣嘅後防線。

呢個做法，同時比阿朗素排更多3-4-1-2陣式嘅彈性，喺保持體系嘅同時添加多個射手，增加入波機會。球隊上季入球同助攻數都偏向平均，主要由翼鋒迪亞比、右翼衛費林邦處理關鍵一腳。
利華古遜呢個夏天賣走兩位相對年輕嘅主力，除咗上除提及嘅首席射手迪亞比離隊外，左翼衛鐵膽伯卡（Mitchell Bakker）亦都被賣走，同位置換成更有經驗嘅基馬度免費加盟。球隊總監路夫斯就解釋，話要為球隊幾個位置提供更多穩定性，加入更多有經驗嘅球員，首要目標係強化嘅既定戰術框架。30歲嘅沙卡，就係呢個諗法下嘅重要引援，球隊需要佢喺中後場控制節奏，以及一腳長傳加速攻勢，令球隊控球在腳時踢得更有效率。

「我加盟之前我哋就有傾過，佢會當我係六號位咁擺，而我自己就踢乜都得。」 以往被批評防守反應慢嘅沙卡，三中堅陣式彌補到佢嘅缺陷，甚至被對手快速反擊時，亦有另一名防中球隊向中路補位，令沙卡可以更放心向左路協防，暫時填補基馬度身後嘅空位。