強援簽不完！維拉迎柏奧托利斯加盟，與艾瑪利故劍重逢 精選

簽完泰利文斯仲未夠？阿士東維拉奪得歐洲賽席位後，夏季增兵野心盡現，喺自由市場突襲得到搶手貨中場泰利文斯之後，即將以低於買斷價嘅價格投得第二個強援 - 中堅柏奧托利斯（Pau Torres）。
自從維拉升班以嚟，一直喺英超中下遊奮勇求存。上季季初喺謝拉特帶領下深陷降班漩渦，高層果斷換帥，由維拉利爾挖嚟領隊艾瑪利（Unai Emery），一舉由護級份子躍升到歐洲賽區，嚟緊呢季將會征戰第三級嘅歐協聯。

呢段時間以嚟，維拉都練出唔少將才。後防方面，干沙同明斯可以話係英超其中一對控傳能力強嘅中堅組合，能為球隊嘅後場組織戰術奠定根底。柏奧托利斯嘅加盟，可以帶嚟干沙之後嘅第二個選擇。
今年有26歲嘅托利斯，係維拉利爾當地土生土長嘅青訓產品，5歲就披上黃潛球衣學師，未曾離開過呢支家鄉球會，除咗2018-19球季借去馬拉加成長之外。歸隊後，托利斯獲得球隊一紙五年長約，包括高達£60M嘅解約金條款。據《Skysports》報導，阿士東維拉同維拉利爾嘅談判之中，協議攤長呢個解約金嘅還款期，今個夏天淨係需要比£45M首期。

維拉利爾近年由艾瑪利執教，由以往嘅西甲中游一舉躍升為歐洲黑馬，2021年喺歐霸盃戰線高舉獎盃之後，第二年更加喺歐聯殺出重圍，淘汰賽連贏祖雲達斯、拜仁慕尼黑等兩大歐洲豪門，聲勢一時銳不可擋。

作為中堅嘅柏奧托利斯，聞名於佢左腳用球嘅能力，以往喺維拉利爾，經艾瑪利提拔重用，柏奧托利斯成長成歐洲其中一個最灸手可熱嘅左腳中堅，腳法柔韌，大局觀完整，將會深化維拉嘅後場陣容。而呢大半季，維拉利爾由前巴塞主帥施迪安執教，貫徹執行控球戰術，特別係門將連拿時常加入中堅群做組織。呢個時候，托利斯會移到左邊路位置，進一步推進左閘前壓。
以往有艾斯度邊恩呢類快閘拍住上，托利斯嚟到阿士東維拉，隊友甸尼雖然擅攻，但速度未算係最快嗰類，維拉需要繼續增兵，先可以真正擠身英超勁旅之列。艾瑪利喺上季季初被阿士東維拉挖角，重返英超後隨即搶得歐洲賽席位，如今又有親信舊部來投，來季形勢一片向好。