阿仙奴終於「開飯」 - 懷斯加盟 升級槍手中場線 精選

韋斯咸中場迪勤懷斯（Declan Rice）廣傳離隊已久，到咗六月底終於有定案，將以£105M加盟上季失落冠軍嘅阿仙奴。

上季英超「雙頭馬車」，喺夏天一同對懷斯虎視耽耽，而喺一輪競價之後，曼城宣佈退出，阿仙奴相隔4年，再度打破隊內轉會費紀錄。有洛迪、菲臘斯等等國腳正選級別嘅防中在陣，曼城依然向懷斯伸手，外界少不免有「抬價」嘅疑慮。但考慮到阿仙奴係哥迪奧拿延續王朝嘅大障礙，出手提高對手嘅建隊成本，係可以理解嘅事。