【轉會傳聞】心灰意冷的簡尼，求才若渴的紅魔 精選

付出十年最寶貴嘅青春，同一手養育自己嘅球會一齊發呢個爭標夢。但夢醒後，發覺呢條路只有自己一個人努力地走，過去嘅付出儼如一泡虛影，人生最難過嘅莫過於此。

十年熱刺生涯，兩次叩關英聯盃決賽，一次打上歐聯決賽，更有幾季時間具備稱霸英超嘅能力，但全部都唔能夠兌換成最後嘅獎盃。作為朗尼之後嘅英格蘭最強中鋒，哈利簡尼（Harry Kane）大概心灰意冷。要離開呢隊管理不善，前路茫茫嘅熱刺，絕對有令人同情之處。