白禮頓要一億先肯賣!?分析吓卡些度憑咩咁受歡迎

思歪Stadium 於 30/01/2023 發表 收藏文章
白禮頓防守中場卡些度(Moisés Caicedo),上半季打出生涯最佳表現,代表厄瓜多爾喺世界盃都有精采演出,係英超冬季轉會窗嘅風雲人物。據轉會大神Fabrizio Romano嘅消息,車路士£55M嘅報價已被白禮頓拒絕,而阿仙奴以£60M跟上。《Skysports》就話,白禮頓唔想賣卡些度,至少一億鎊先肯放人。呢個今季先堀起嘅00後中場,憑咩咁受歡迎?

先講結論:白禮頓今季走咗咁多主力,成績竟然仲好過上季,歸功於樸達季初嘅調整,同迪沙比之後嘅繼承,當中卡些度發揮相當重要嘅作用,係球隊能夠穩守上半版嘅重要棋子。

阿仙奴而家爭緊冠軍,需要更強嘅板凳深度嚟維持榜首差距;而車路士深陷泥沼,中場嘅運作尚待求變,而主帥樸達正正係卡些度今季上位嘅提攜者。兩大倫敦豪門對引援嘅需求,遠遠高過白禮頓要留人嘅需求。加上佢本身仲有兩年半合約,就算白禮頓而家賣唔成,短期內都唔怕卡些度免費走人,甚至留到今年暑假都唔怕會大價。

以上原因,令白禮頓可以以居高臨下嘅姿態,喺談判桌上處理卡些度嘅轉會案。
21年冬季加盟,之後半年坐板凳,半年外借後,22年冬季開始喺白禮頓嶄露頭腳,至今季比素馬離隊後,正式補上正選防中嘅位置,經歷上半季同世界盃之後,到而家有資格叫價超過一億鎊。年僅21歲嘅卡些度,呢兩年間進步神速。

因為比素馬嘅離隊,白禮頓防線前失去一個可靠嘅屏障,樸達喺季初嘅調整方法,係將風格迴異嘅卡些度提拔上正選,並且收緊陣型嘅密度,以保持更多嘅控球權。今季世界盃前後,都係主要同麥亞里士打形成中場雙核心。

卡些度今季平均每90分鐘創造2.13次射門機會,喺白禮頓陣中唔算高,因為佢主要同麥亞里士打一齊掌控節奏,創造射門機會嘅工作,交比托沙、馬治、哥斯等等嘅進攻主力(雖然馬治、哥斯有部份時間要打翼衛同閘位)。
但佢嘅抗壓性之強,令佢能夠喺高壓迫嘅情況下,往往能夠保住球權,保持球隊嘅控球質素。喺防中嘅基礎定位下,卡些度有足夠嘅體能做box-to-box,球場覆蓋範圍極廣,亦交出合格嘅組織能力。相反,麥亞里士打係喺中場中嘅基礎定位,常常出現喺六號位做墮後組織核心。兩個人交互配合,令白禮頓中場更顯得立體。
今季,白禮頓場均入球由1.05上升到1.74球,失球由1.16上升至1.26,用稍稍退步嘅防守成績,換嚟大幅度進步嘅進攻成績,喺丹般、比素馬、慕比等主力球員離隊下,樸達同迪比利嘅調整,可謂非常之成功。而卡些度嘅存在,就係呢項調整行得通嘅關鍵。

出售托沙之後,迪沙比都話,希望可以至少留卡些度踢埋呢季。面對兩大豪門夾擊,而且臨近轉會死線,白禮頓實在有條件開高價。

留言


請按此登錄後留言。未成為會員? 立即註冊
    快捷鍵:←
    快捷鍵:→