由PSV到利物浦，加普如何快速適應英超節奏？ 精選

世界盃打出好表現之後，荷蘭翼鋒加普（Cody Gakpo）即將披上利物浦嘅戰衣。球迷要關注嘅，係佢喺利物浦左翼傷患潮之下，會交出啲咩表現。
加普2018年喺PSV青年軍升上成年隊，咁耐以嚟上陣159場，合共105次參與入球，入波同助攻幾乎對半（55個入球、50個助攻），基本數據已經睇得出佢傳射皆精嘅能力。而最近呢一季半，佢喺荷甲平均每90分鐘交出超過0.7次助攻、超過0.6次入球，喺荷甲入球數排前列嘅中前場球員當中，平均助攻最多嘅就係加普。21/22球季荷甲最佳球員，亦係由呢位年輕球員奪得。

當然，因應兩個聯賽實力上嘅差異，唔能夠單單用荷甲嘅數據嚟預想佢喺英超嘅表現。不過，亮麗數據嘅背後，承載住佢多功能嘅特性。

而喺前主帥羅渣舒密特執教下，PSV燕豪芬以高壓防守立足於荷甲。球隊之後由傳奇名宿雲尼斯達萊接手，雲佬更加係奉行比爾沙瘋狂壓迫嘅哲學。加普喺呢個環境之下急速成長，甚至短時間之內晉升成為國腳鐵膽，高普睇中佢嘅地方，係佢身心屬性都具備極高天賦，團隊意識相當強烈，速度同射術兼備，相信佢可以好快適應得到屬性相近嘅利物浦。
但對加普嚟講，由荷甲轉戰英超最大嘅困難，主要係防守球員質素嘅提升，閱讀守將動作時要做更細心嘅判斷。而佢做得比較差嘅係防守，雖然佢施壓嘅強度有逐步上升，但未能夠交出好好嘅質素，包括單對單施壓嘅時機、落腳點、力量等等，都需要時間去執。

而前一篇文章提到佢喺反擊嘅時候唔會做無謂嘅上腳，喺荷蘭因為球隊控球時間少，令佢持球時嘅弱點得以被掩蓋。但嚟到利物浦，球隊主動進攻嘅時間會唔少，而加普有更多球權嘅時候，需要更加快速決定下一步點樣用球。利物浦比較好嘅，係有費明奴、泰亞高呢一類可以快速做決定嘅play-maker，一旦加普遇上重重圍困，仍可以放心將個波交返比隊友，自己做返擅長嘅捕位衝刺。

不過比高普睇得上，加普對於壓迫嘅積極性同意識，早已有返咁上吓嘅水準。喺呢個條件之下，佢要調整嘅係對對手後場傳控嘅判讀、同英超對手埋身肉搏時要點樣食身位，等等喺反搶上嘅細節，以乎合球隊喺反搶戰術上嘅需要。
文尼今年離隊，紅軍冠軍三箭頭就得返輔鋒費明奴同右翼沙拿，佢嘅兩個都年過三十，相比之下，舊年買返嚟嘅迪亞斯，同即將加盟嘅加普都相當年輕。呢兩筆收購，長遠嚟講就係接班。迪亞斯已經證明咗自己可以短時間內適應新聯賽，加普要直接競爭嘅話，嚟緊呢兩個月擔正嘅機會，相當關鍵。