祖高美斯克服恐怖膝傷 相隔三年重返三獅軍團：「翻開新一頁」 精選

踏入國際賽期，唔少國家隊都有相隔多時重返大軍嘅老面孔，利物浦後衛祖高美斯（Joe Gomez）就係其中一人。

自2020年11月以嚟，高美斯就冇再參與過國家隊。當時佢喺隊內訓練嗰陣起跳受傷，傷及膝蓋肌腱，要馬上送院處理，自此同三獅軍團無緣。
「我哋當時進行緊11對11訓練，然後我髕骨腱撕裂。我當時一個人企喺度，想去傳波，踩上草面，就咁撕裂咗膝頭。」 相隔三年幾回歸國家隊，高美斯回憶當時嘅情況：「 如果我話呢件事冇對我造成心理影響嘅話，實係老吹。突然要由訓練場坐白車走，呢件事對我嚟講真係刻骨銘心，直至尋日熱身嗰陣都係記憶猶新。」
「我諗可以好好咁翻過呢一頁，唔使吓吓都提起咁誇張。」

而喺意外發生前一個月嘅國際賽期，高美斯同國家隊隊友史達寧發生爭執，事源當時正係曼城對利物浦大戰嘅下一日，雙方打得火熱，火氣燒到入國家隊訓練營。事件甚至令高美斯喺溫布萊球隊被己隊球迷噓，非常尷尬。傷患同醜聞嘅交織，令當時23歲嘅高美斯好難過。 「當時心理上好辛苦，因為嗰排我要獨自面對，再次信任自己嘅身體。但我感激一切可以順利。」

「我大部分嘅動力，嚟自於嗰排努力復原嘅過程，唔想失去呢股動力。」高美斯認為，受傷嗰陣嘅低潮，激發出而家嘅佢。
作為非主力陣容嘅球員，今季高美斯喺利物浦出場時間都唔少，主要都係幫其他後防隊友客串。踏入2024年之後，更開發出防中位置，2號波衫身在中場睇落有啲格格不入，但都能夠好好為球隊貢獻，英聯盃決賽早段利物浦有中場加雲貝治傷出，高美斯以防中身份入替，成功為球隊守得零失球。

「代表英格蘭踢波係一種特權，同時都伴隨住壓力。能夠出現喺度，要心存感恩，因為國家隊唔係事必要你喺度。」 而因為呢段時間嘅好表現，令高美斯再一次得到被英軍主帥修夫基（Gareth Southgate）徵召嘅機會，佢馬上取消原訂嘅杜拜假期行程，前往英格蘭中部St. George’s Park參加集訓。

「修夫基對我好好。我一路跟住佢踢，第一次出場都係因為佢。」由U-21開始，高美斯已經跟住修夫基。而家再次受到徵召，目標係打入歐國盃大軍名單。